قۇرمەتتى قالا تۇرعىندارى، ءوزدەرىڭىز بىلەتىندەي، كوروناۆيرۋس تەز تاراپ، اۋىرعان ادامداردىڭ سانى ارتىپ كەلەدى. وكىنىشكە قاراي، ادام شىعىنى دا بار. ىندەت كەسىرىنەن قازا بولعان كىسىنىڭ وتباسىنا كوڭىل ايتامىز. دارىگەرلەر قولىنان كەلگەننىڭ ءبارىن جاسادى.

بۇل وقيعا ينفەكسيانىڭ قانشالىقتى ءقاۋىپتى ەكەنىن تاعى ءبىر رەت كورسەتتى.

بىرىنشىدەن، ول اۋرۋحانانى ءقازىر كارانتينگە جاپتىق، كەيبىر دارىگەرلەر دە كارانتينگە جاتتى.

تاعى ءبىر كارانتينگە جابىلعان نىسان – ول №1 اۆتوبۋس پاركى.

مونيتورينگ بارىسىندا اتالعان مەكەمەنىڭ جۇمىسشىسى ۆيرۋس جۇقتىرعانى انىقتالدى. قالا تۇرعىندارىنىڭ قاۋىپسىزدىگى ءۇشىن اۆتوپارك جۇمىسشىلارى تەسكەرۋدەن وتەدى. مەكەمە اۋماعىنا جانە اۆتوبۋستارعا دەزينفەكسيا جۇمىستارىن جۇرگىزدىك.

ءبىز بۇل ءقاۋىپتى ءتارتىپ پەن قاتاڭ شارالارسىز ەڭسەرە المايمىز.

ەكىنشىدەن، 30 ناۋرىز بەن 5 ءساۋىر ارالىعىندا قوعامدىق كولىكتەر توقتايدى. اۆتوپارك جۇمىسشىلارىنىڭ دەنساۋلىعى تەكسەرىلەدى.

بايقاعانىمىز، مەرەكە كۇندەرىنەن كەيىن كوشەدەگى حالىقتىڭ قاراسى كوبەيدى.

ازاماتتاردىڭ وقشاۋلانۋىن قامتاماسىز ەتۋ ماقساتىندا مەملەكەتتىك كوميسسيانىڭ شەشىمىمەن 30 ناۋرىز بەن 5 ءساۋىر ارالىعى جۇمىسسىز اپتا بولىپ جاريالاندى. مەديسينا، قۇقىق قورعاۋ جانە قالا ءومىرىن قامتاماسىز ەتەتىن كوممۋنالدىق شارۋاشىلىق قىزمەتكەرلەرى جۇمىسىن جالعاستىرا بەرەدى. ينفەكسيامەن كۇرەستىڭ الدىڭعى شەبىندە جۇرگەندەردى تاسىمالداۋ ءۇشىن كولىك ۇيىمداستىرۋعا كومەكتەسەمىز.

ۇشىنشىدەن، ازىق-تۇلىك الۋعا، ءدارىحانالارعا بارۋعا، مەديسينالىق قىزمەت الۋعا جانە رۇقسات ەتىلگەندەرگە جۇمىسقا بارۋعا عانا رۇقسات ەتىلەدى. باسقانىڭ ءبارى شەكتەلەدى، ۇيدەن شىعۋعا بولمايدى.

ءبىر ايتا كەتەتىنى، بۇل ەندى جاي عانا ءوتىنىش ەمەس، ءاربىر ادام قاتاڭ ساقتاۋى ءتيىس توتەنشە جاعدايدىڭ ءتارتىبى.

ەندى قالا كوشەلەرىن پاترۋلدىك قىزمەت قاداعالايدى.

الدەكىمنىڭ جاۋاپسىزدىعى باسقا ادامداردىڭ ومىرىنە ءقاۋىپ بولماۋى ءتيىس!

تورتىنشىدەن، 25 ناۋرىزدان باستاپ زەينەتكەرلەردىڭ، ديسپانسەرلىك ەسەپتە تۇرعان ازاماتتاردىڭ ۇيلەرىنە دارى-دارمەك، قورعانىس قۇرالدارىن جانە ازىق-تۇلىكتى تاسىمالداۋ جۇمىستارى جۇرگىزىلۋدە. وتىنىشتەر iKomek 109 قىزمەتى ارقىلى قابىلدانىپ جاتىر.

ازىق-تۇلىك دۇكەندەرى جۇمىس ىستەي بەرەدى.

بەسىنشىدەن، كامەلەت جاسىنا تولماعان بالالاردىڭ ۇلكەن ادامدارسىز كوشەدە جۇرۋىنە تىيىم سالىنادى. 6 ساۋىردەن باستاپ وقۋشىلاردى ونلاين فورماتپەن وقۋعا كوشىرەمىز.

التىنشىدان، ساياباقتار، سكۆەرلەر، جاعالاۋلار، كوشەدەگى بالالار وينايتىن الاڭدار، تاعى باسقا قوعامدىق ورىنداردىڭ بارلىعى جابىق.

قۇرمەتتى قالا تۇرعىندارى!

قوعامدىق ءتارتىپتى ساقتاۋ – ءارقايسىمىزدىڭ ازاماتتىق پارىزىمىز! تەمىردەي تارتىپتەن باسقا جول جوق. جاقىندارىڭىزدىڭ جانى قينالعانىن كۇتپەڭىزدەر. قازىردەن باستاپ قامدانعان ءجون!