قازاقستانداعى اقپاراتتىق كەڭىستىكتە ديپفەيك تەحنولوگياسىمەن جاسالعان جالعان ۆيدەولاردىڭ جاڭا تولقىنى تارالۋدا. بۇل جولى الاياقتار ينتەرنەت جەلىسىندە قازاقستان پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋدىڭ بەينەسى مەن داۋسىن قولدان جاساپ، جالعان ۆيدەو تاراتقان،- دەپ حابارلايدى Dalanews.kz
ۆيدەودا ءمينيستردىڭ رەسەي اۋە كەمەلەرىنىڭ ەركىن ۇشۋى «تولىق زاڭداستىرىلدى» دەپ مالىمدەگەنى كورسەتىلگەن. سونىمەن قاتار ۆيدەودا وتاندىق ءجۋرناليستىڭ دە وسى شەشىمدى قولدايتىنى كورسەتىلگەن. الايدا بۇل اقپارات شىندىققا جاناسپايدى.
ۆيسە-پرەمەردىڭ اتىنان جاريالانعان بۇل فەيك ۆيدەوعا بايلانىستى قۇزىرلى ورگاندار رەسمي تۇردە تۇسىنىكتەمە بەرىپ، مۇنداي جالعان اقپاراتتارعا سەنبەۋگە جانە تەكسەرىلمەگەن دەرەككوزدەردەن تارالعان مالىمەتتەردى بولىسپەۋگە شاقىردى.
اتالعان ۆيدەوعا قاتىستى جۋرناليست تە ءوز پىكىرىن ءبىلدىرىپ، مۇنداي مانيپۋلياسيالارعا تاڭ قالعانىن جەتكىزدى:
«بۇل ۆيدەوعا سەنسەك، مەن ەندى جاي جۋرناليست ەمەس، حالىقارالىق شەشىمدەرگە ىقپال ەتەتىن ادام ەكەنمىن»، – دەپ جازدى عازيزا رايىمبەك الەۋمەتتىك جەلىدەگى پاراقشاسىندا.
قۇزىرلى ورگاندار ازاماتتاردى اقپارات تۇتىنۋدا ساق بولۋعا، تەك رەسمي جانە سەنىمدى دەرەككوزدەرگە جۇگىنۋگە شاقىرادى.
