الاۋگەر – ستۋدەنتتەر ۋنيۆەرسيتەت ماقتانىشى

Dalanews 30 قاڭ. 2017 05:42 536

28-بۇكىلالەمدىك قىسقى ۋنيۆەرسيادانىڭ كوپتەن كۇتكەن الاۋى «نازاربايەۆ ۋنيۆەرسيتەتىندە» باستاۋ العان العان بولاتىن. ەستافەتانى الىپ ءجۇرۋ شاراسىنا قىزدار ۋنيۆەرسيتەتىنىڭ ستۋدەنتى تۇرسىن ايان دا قاتىستى. ول وقۋ ورنى اتىنان ۇسىنىلعان ۇزدىك 13 ستۋدەنتتىڭ اراسىنان ەڭ لايىقتى ستۋدەنت دەپ تابىلعان بولاتىن.

تۇرسىن ايان قىزدار ۋنيۆەرسيتەتىنىڭ ماقتانىشى سانالاتىن ول تاەكۆوندودان، ۋشۋ-ساندادان جانە جەكپە-جەكتەن سپورت شەبەرى، تاتاميدەن بەس دۇركىن قازاقستان چەمپيونى. سونىمەن قاتار، 2008 جىلى ياكۋتيادا وتكەن «ازيا بالالارى» اتتى حالىقارالىق سپورت ويىندارىنىڭ، قازاقستان چەمپيوناتىنىڭ (2014) جانە  كونفەدەراسيا كۋبوگىنىڭ (2014) قولا جۇلدەگەرى. 2010 جىلى الماتىدا وتكەن جاستار ويىندارىنىڭ جانە 2012 جىلى وتكەن ايەلدەر سپارتاكياداسىنىڭ كۇمىس جۇلدەگەرى. 2013 (اقتوبە) جانە 2014 (الماتى) جىلدارى ستۋدەنتتەر اراسىنداعى جارىستىڭ قازاقستان چەمپيونى اتانعان.

سپورت دەسە ىشكەن اسىن جەرگە قوياتىن تۇرسىن ايان ۋشۋ-ساندادان دا ەكى دۇركىن ەل چەمپيونى. 2014-2015 جىلدارى ەكى جىل قاتارىنان الماتى قالاسىندا ۋشۋ-ساندادان ايەلدەر اراسىندا وتكەن قازاقستان چەمپيوناتىندا 1 ورىندى جەڭىپ، وزىنە تەڭ كەلەر ەشكىم جوق ەكەندىگىن دادەلدەگەن بولاتىن. ول سونىمەن قاتار، ءدال وسى جىلى اتالعان سپورت تۇرىنەن قازاقستان كۋبوگىندە التىن مەدالعا يە بولدى. جەكپە-جەك سپورتىندا دا جۇلدەلى ورىندارعا يە بولىپ جۇرگەن تۇرسىن ايان 2016 جىلى تالدىقورعان قالاسىندا جەكپە-جەكتەن وتكەن قازاقستان چەمپيوناتىندا 1 ورىندى يەلەنىپ، جەڭىس تۇعىرىنان كورىنگەن ەدى.

قىزدار ۋنيۆەرسيتەتىنىڭ 1 كۋرس ستۋدەنتى تۇرسىن ايان قازىرگى تاڭدا «دەنە شىنىقتىرۋ جانە سپورت» ماماندىعى بويىنشا ءبىلىم الۋدا. ول 1994 جىلى 23 تامىزدا الماتى قالاسىندا دۇنيەگە كەلگەن. 2004 جىلدان باستاپ تاەكۆوندومەن اينالىسا باستاعان. العاشقى باپكەرى ۇسىكبايەۆ ەرحان تولەۋ ۇلى. ول الماتى قالاسى «شاڭىراق» ىقشام اۋدانىنداعى دارىندى بالالارعا ارنالعان سپورت مەكتەپ-ينتەرناتىنىڭ تۇلەگى.

– 4 سىنىپتان باستاپ سپورتپەن اينالىسىپ كەلەمىن. سپورت مەنىڭ ومىرلىك سەرىگىم. تۇڭعىش رەت ەلىمىزدە وتكىزىلىپ وتىرعان ۋنيۆەرسيادادا ەلىمىزدىڭ بەلگىلى تۇلعالارى مەن مىقتى سپورتشىلاردىڭ قاتارىندا الاۋدى الىپ ءجۇرۋ مەن ءۇشىن ۇلكەن مارتەبە. وتە قۋانىشتىمىن. ونى سوزبەن ايتىپ جەتكىزۋ مۇمكىن ەمەس، – دەدى الاۋ ۇستاعان تۇرسىن ايان.

الداعى ۋنيۆەرسيادا ويىندارىنا كىمدەر قاتىسادى، ۇكىلەپ قوسقان قانداي ساڭلاقتارىمىز جۇلدەلى ورىندارعا ىلىگەدى ەكەن دەگەن سۇراق ءاربىر قازاقستاندىق جانكۇيەردىڭ كوكەيىندە تۇرعانى شىندىق. ايتۋلى دودادا ەل نامىسىن قورعايتىن سپورتشىلار قاتارىندا قىزدار ۋنيۆەرسيتەتىنىڭ ستۋدەنتى، تاۋ شاڭعىسى سپورتىنىڭ شەبەرى، قازاقستان چەمپيونى ماريا گريگوروۆا دا بار. ماريا پەداگوگيكا جانە پسيحولوگيا فاكۋلتەتىنىڭ دەنەشىنىقتىرۋ جانە سپورت ماماندىعىنىڭ ءىى كۋرس ستۋدەنتى. وسىعان دەيىن ماريا ءبىر ەمەس، بىرنەشە جارىستاردىڭ جەڭىمپازى اتانىپ ۇلگەرگەن. ول 2014، 2015، 2016 جج. قازاقستان رەسپۋبليكاسىنىڭ چەمپيونى، ق ر ۇلتتىق قۇراما كومانداسىنىڭ مۇشەسى.

ايتا كەتەيىك، تاۋ شاڭعى سپورتى بويىنشا ۋنيۆەرسيادادا ماريا گريگوروۆامەن بىرگە ەل نامىسىن مارتين حۋبەر، سەرگەي دانوۆ، زاحار كۋچين، الەكساندر كوستروۆ، الەكسەي سىسويەۆ، ەكاتەرينا كارپوۆا قورعايتىن بولادى.

– جاقىندا عانا شىمبۇلاقتا وتكەن تەستتىك جارىستا جاقسى ناتيجە كورسەتتىم. ەكى رەت بەرىلگەن مۇمكىندىكتە جولدى وتە جاقسى ءوتىپ، 9 سپورتشىنىڭ اراسىندا ءبىرىنشى جانە ەكىنشى كەلدىم. جارىسقا 100 پايىز دايىنمىن دەسەم بولادى. ۋنيۆەرسيادادا بارىمدى سالاتىن بولامىن جانە جاقسى ناتيجە كورسەتۋگە بارىنشا تىرىسامىن، – دەيدى ماريا گريگوروۆا ءوز جانكۇيەرى قىزدار ۋنيۆەرسيتەتىنە ۇلكەن سالەمىن جولداپ.

 

«قىزدار ۋنيۆەرسيتەتى» مەديا ورتالىعى

ۇسىنىلعان
سوڭعى جاڭالىقتار