بۇگىنگى تاڭدا الاكول كولىنىڭ جاعالاۋىندا ءبىر جولعى سىيىمدىلىعى 16،2 مىڭ توسەك-ورىن بولاتىن 302 تۋريزم نىسانى ورنالاسقان. وسى جىلى جەكە ينۆەستيسيالار ەسەبىنەن 1،4 ملرد. تەڭگە سوماسىنا تاعى 8 نىساندى ىسكە قوسۋ جوسپارلانىپ وتىر. وتكەن جىلى الاكولگە شامامەن 1،6 ملن. ادام كەلسە، بيىل 2 ملن. تۋريست كەلەدى دەپ كۇتىلۋدە، – دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
جەتىسۋ وبلىسى كاسىپكەرلىك جانە يندۋستريالىق-يننوۆاسيالىق دامۋ باسقارماسىنىڭ دەرەكتەرى بويىنشا، الاكول كولى باعىتىنا جازعى ماۋسىمدا (ماۋسىمنان تامىزعا دەيىن) اپتاسىنا 28 رەت استانا، الماتى، تالدىقورعان قالالارىنان 3 اۆيارەيس جۇزەگە اسىرىلادى.
ونىڭ ىشىندە «ءالماتى-ۇشارال» جانە «تالدىقورعان ءۇشارال» رەيستەرى سۋبسيديالانادى، سونداي-اق 1 كوممەرسيالىق «ءاستانا-ۇشارال» رەيسى بار. وعان قوسا الماتى، استانا قالالارىنان، شىعىس قازاقستان جانە اباي وبلىستارىنان 12 تەمىرجول رەيسى، ونىڭ ىشىندە «استانا-دوستىق» باعىتىندا «تالگو» پويىزى جۇرەدى. سونىمەن قاتار جازعى ۋاقىتتا «الماتى قالاسى – اقشي اۋىلى – كوكتۇما اۋىلى»، «تالدىقورعان قالاسى – اقشي اۋىلى – كوكتۇما اۋىلى» باعىتتارى بويىنشا 50 ورىندىق اۆتوبۋس مارشرۋتتارى تۇراقتى تۇردە اشىلدى. وسى باعىتتار بويىنشا اۆتوبۋس كۇندەلىكتى قاتىنايدى.
– الاكول كولىندە وقىس جاعدايلاردىڭ الدىن الىپ، جەدەل دەن قويۋ ءۇشىن تجد قۇتقارۋ بولىمشەسى سۇڭگۋىر جابدىقتارىنىڭ 21 جيىنتىعىن، جاڭا قوزعالتقىشتارمەن جابدىقتالعان 7 موتورلى قايىق، 2 رەزەڭكە قايىق، 2 ۋاز، نيۆا، كاماز جانە امبەباپ «ترەكول» اۆتوماشينالارىن دايىندادى.
اقشي مەن كوكتۇم اۋىلدارىندا ءورت قاۋىپسىزدىگىن قامتاماسىز ەتۋ ءۇشىن ۋاقىتشا ءورت ءسوندىرۋ بەكەتتەرى ۇيىمداستىرىلدى.
سونداي-اق، وسى ەلدى مەكەندەرگە جازعى ماۋسىم كەزەڭىندە تاۋلىك بويى كەزەكشىلىك ەتۋ ءۇشىن جەدەل جاردەم دارىگەرلەرىنىڭ 2 بريگاداسى جىبەرىلدى.
كولىكتىك باقىلاۋ ينسپەكسياسى ءجۇزۋ قۇرالدارىن باقىلاۋدى جۇزەگە اسىرۋ ءۇشىن قايىق ساتىپ الدى، ەندى بيىل سۋداعى قوزعالىس قاۋىپسىزدىگىن 2 ينسپەكتور باقىلايدى. جاعالاۋدىڭ تازالىعىن قامتاماسىز ەتۋ ءۇشىن الاكول اۋدانىنىڭ اكىمدىگى جازعى ماۋسىمدا تۇرمىستىق قاتتى قالدىقتاردى شىعارىپ، جاعالاۋدا كۇن سايىن سانيتارلىق تازالاۋ جۇرگىزەتىن بولادى. 120 قوقىس كونتەينەرى مەن باكتار بار، 24 سانيتارلىق-گيگيەنالىق توراپ جانە 10 بيوتۋالەت ورناتىلدى، – دەپ حابارلادى باسقارمادان.
