مەكتەپتە توعىز ايعا سوزىلعان وقۋدان بوسايتىن بالالاردىڭ جازعى دەمالىسىن اتا-اناسى جوسپارلاپ قويادى. ءبىرى اۋىلعا اتا-اجەسىنە بارسا، ءبىرى ساۋىقتىرۋ لاگەرلەرىنە بارۋدى ءجون سانايدى. تابيعاتى اسەم دە كوركەم جەردە ورنالاسقان لاگەر كەز-كەلگەن بالاعا ۇلكەن اسەر قالدىراتىنى ءسوزسىز.
وسى رەتتە، ايدىندى الاكول جاعالاۋىندا بالالارعا ارنالعان ساۋىقتىرۋ ورىنىنىڭ جۇمىسى قولعا الىنىپ، الماتى وبلىسى بۇلدىرشىندەرىنىڭ دەمالىسىن پايدالى ءارى قىزىقتى وتكىزۋ ماقساتىندا وڭىردە جاڭا بالالار كەشەنى بوي كوتەرمەك. اتالمىش لاگەر جۇمىسىنا جاۋاپتى الماتى وبلىسى قۇرىلىس باسقارماسى.
«جالىن» قالا سىرتىنداعى بالالار دەمالىس ورنىنىڭ جوباسىنا سايكەس لاگەر اۋماعىندا 20 ورىندىق بەس جاتىن كورپۋس، ءبىر شىعارماشىلىق ءۇي، ءبىر اسحانا، پەرسونالعا ارنالعان جاتاقحانا، ءبىر مەدپۋنكت، بالالار الاڭى، بالالار قالاشىعى، سپورت الاڭدارى، قوناق ءۇي سالىنۋ جوسپارلانۋدا.
سونىمەن قاتار، وبلىس بويىنشا جازعى دەمالىس كەزىندە ءبىر ماۋسىمدا 100 – دەن استام بالانى قابىلداۋ كوزدەلىپ وتىر. ول دەگەنىمىز ءبىر ماۋسىم ون كۇن ارالىعىن قامتىسا، التى ماۋسىمدا 600 دەي بالاعا دەمالۋعا مۇمكىندىك جاسالادى.
ايتىپ ءوتۋ كەرەك، دەمالىس ورنىنا كەلەتىن بالالار توبى جاس ەرەكشەلىكتەرىنە بايلانىستى جيناقتالادى. بۇدان بولەك، قۇرىلىس- مونتاج جۇمىستارىنىڭ اياقتالۋ مەرزىمى وسى جىلعا جوسپارلانىپ وتىر.
سونداي – اق، قۇرىلىس جۇمىستارىنا 100-گە جۋىق ادام جۇمىسپەن قامتىلسا، ونىڭ ىشىندە شتاتتىق رەجيمدە 47 تۇراقتى جۇمىس ورنىڭ اشۋ قاراستىرىلۋدا.
«جۇمىسپەن قامتۋدىڭ جول كارتاسى» باعدارلاماسى شەڭبەرىندە سالىناتىن جاسوسپىرىمدەرگە ارنالعان «جالىن» قالا سىرتىنداعى لاگەردىڭ جالپى قۇنى 1،109،452،323 ملن.تگ. قۇرايدى.
مامانداردىڭ ايتۋىنشا اقشي اۋىلى ماڭىندا بوي كوتەرەتىن «جالىن» قالا سىرتىنداعى لاگەرىنىڭ عيماراتتارى مەن قۇرىلىستارىن قازىرگى زامانعى تالاپتارعا ساي جاساقتالادى.
بۇل ءوز كەزەگىندە بالالاردىڭ ەمىن ەركىن دەمالۋىنا قولايلى جاعداي جاساۋ مەن سالاۋاتتى ءومىر سالتىن ۇستانۋىنا ىقپال ەتەدى.
زاماناۋي ۇلگىدە بوي كوتەرەتىن لاگەر كەلەر جىلى تولىعىمەن اياقتالىپ، جاس جەتكىنشەك بالالاردىڭ يگىلىگىنە بەرىلەتىن بولادى.
الاكول اۋدانى اكىمىنىڭ باسپا ءسوز قىزمەتى
