جەزقازعانداعى«مەتاللۋرگ» ستاديونى ەندى ۋەفا ستاندارتىنا ساي، - دەپ حابارلايدى Dalanews.kz.
جەزقازعانداعى 6 مىڭ جانكۇيەر سياتىن «مەتاللۋرگ» ستاديونى ەندى حالىقارالىق تالاپقا تولىق ساي.فۋتبول الاڭدارىن جاڭارتۋ سىندى بۇل يگى باستاماعا قازاقستان فۋتبول فەدەراسياسى ALAÑ جوباسى اياسىندا مۇرىندىق بولعان. بۇل ستاديونىنداعى جاسىل الاڭ سوڭعى رەت 14 جىل بۇرىن جوندەۋدەن وتكەن. ەندى ALAÑ جوباسى ارقاسىندا يتاليالىق ساپاداعى توسەنىش توسەلدى.
«ءبىز ءبىر جىل ىشىندە ەلىمىز بويىنشا جاڭا 10 الاڭدى قولدانىسقا بەردىك. ALAÑ - بۇقارالىق فۋتبولدى دامىتۋعا ارنالعان جوبا. فۋتبول ويناۋ ارقىلى بالالارىمىز الەۋمەتتىك جەلىلەردەن باسىن تارتادى، دەنساۋلىعىن كوتەرەدى، ال وسكەلەڭ جاس ۇرپاققا جاعداي جاساۋ - ءبىزدىڭ مىندەتىمىز. سوندىقتان، ەلىمىزدىڭ فۋتبولىن بىرگە دامىتايىق. ەل بىرلىگى ارتا بەرسىن»، - دەدى قفف پرەزيدەنتى ادىلەت بارمەنقۇلوۆ.
فۋتبول الاڭدارىن جاڭارتۋ اياسىنداعى قفف-نىڭ ALAÑ جوباسى 2023 جىلى باستاۋ العان. ءۇش جىلعا ارنالعان باعدارلاما ۋەفا-نىڭ قولداۋىمەن جۇزەگە اسىرىلادى. جوبانىڭ باستى سەرىكتەسى - 1XBET بۋكمەكەرلىك كومپانياسى، ال ماقساتى - فۋتبول ينفراقۇرىلىمىن دامىتىپ، بۇقارالىق فۋتبولدى دامىتۋعا جاعداي جاساۋ.
«60 جىلعا جۋىق تاريحى بار ستاديون ALAÑ باعدارلاماسى اياسىندا جوندەلدى. مەملەكەت باسشىسى بيىلعى قازاقستان حالقىنا جولداۋىندا بۇقارالىق سپورتتى دامىتۋعا ەرەكشە ءمان بەرىپ ناقتى تاپسىرمالار بەردى. قازاقستان فۋتبول فەدەراسياسىنىڭ باسشىلىعىنا جانە ALAÑ جوباسىنا اتقارىلعان ۇلكەن يگى ءىس ءۇشىن العىس ايتقىم كەلەدى. جەڭىستى كۇندەرىمىز كوپ بولسىن!»، - دەدى ۇلىتاۋ وبلىسىنىڭ اكىمى داستان رىسپەكوۆ.
جالپى، ALAÑ جوباسى بويىنشا 2023-2025 جىلدارى رەسپۋبليكامىزداعى 20 فۋتبول الاڭىن جاڭارتۋ جوسپاردا بار. بۇعان دەيىن ەلىمىزدە اقتوبە، الماتى، شىمكەنت، پەتروپاۆل، وسكەمەن، اياگوز، اقسۋ، بالقاش قالالارى مەن جەتىسۋ وبلىسىنداعى الاڭدار قولدانىسقا بەرىلگەن بولاتىن. ەندى جىل سوڭىنا دەيىن قىزىلوردا، اتباسار، ساران قالاسىندا جاسىل الاڭدى بەرۋ جوسپارلانىپ وتىر.
