وبلىس اكىمىنىڭ قىزمەتتىك كولىگىنىڭ ءنومىرى دە كوزدىڭ جاۋىن الادى: 001 WK.
Mercur Auto كومپانياسىنىڭ الماتى قالاسىنداعى وكىلدىگىنىڭ اقپاراتىنا سۇيەنسەك، ورالعا سوڭعى Audi A8 Long اۆتوكولىگى جەتكىزىلگەن. ەندى ديلەر باسقا تاپسىرىس قابىلدامايدى. سەبەبى، وسى جىلدىڭ كۇزىندە بۇل كولىكتىڭ جاڭا ۇلگىسى شىعادى.
التاي كولگىنوۆتىڭ جاڭا كولىگى ارنايى تاپسىرىس بويىنشا جاسالعان كورىنەدى. اۆتوكولىكتىڭ سالونى سيرەك كەزدەسەتىن اعاشتىڭ تۇرلەرىمەن ارلەنگەن، ءارى قىمبات مۋلتيمەديالىق جۇيەمەن جابدىقتالعان. كومپانيا سۋ جاڭا كولىكتى ورالعا وزدەرى جەتكىزگەن.
ماشينانىڭ نارىقتاعى قۇنى – 56 ملن تەڭگە نەمەسە 169 مىڭ دوللار.
بقو اكىمدىگىنىڭ باسپا ءسوز قىزمەتى اكىمنىڭ جاڭا كولىكتى ساتىپ العاندىعىن راستاعان. الايدا كەيىن ولار ءوز مالىمدەمەلەرىن وزگەرتىپ، ءوڭىر باسشىسى كولىكتى جالعا العاندىعىن ايتتى.
«قارجىنى ۇنەمدەۋ ماقساتىندا ءبىز كولىكتى جەرگىلىكتى كاسىپكەرلەردەن جالعا الدىق. التاي كولگىنوۆ جاڭا كولىككە جاڭا جىلدا وتىردى»، – دەدى وبلىس اكىمىنىڭ باسپا ءسوز حاتشىسى جارقىن ءجۇمادىلوۆ.
«ۋرالسكايا نەدەليا» باسىلىمىنىڭ حابارلاۋىنشا، باسپا ءسوز قىزمەتى اكىمنىڭ قىمبات كولىكتى قاي كاسىپكەردەن العاندىعىن ايتپاعان.
جارقىن ءجۇمادىلوۆ تەك «Audi 8L» كولىگىن جالعا الۋ باعاسى ايىنا 50 مىڭ تەڭگە ەكەنىن ايتتى.
