تۇركىستان وبلىسىندا ءبىلىم سالاسىن دامىتۋ، ءبىلىم مەكەمەلەرىنىڭ ينفراقۇرىلىمىن جاقسارتۋ، مەكتەپ تاپشىلىعىن جويۋ باعىتىندا جۇمىستار جالعاسۋدا. وبلىس اكىمى اپپاراتىنىڭ اپتالىق ماجىلىسىندە وسى سالاداعى جۇمىستار باياندالىپ، كەمشىلىكتەر دە ايتىلدى. تۇركىستان وبلىسىنىڭ اكىمى دارحان ساتىبالدى سالا باسشىلارىنا ناقتى تاپسىرمالار بەردى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

– ءبىلىم سالاسىنداعى وزەكتى ماسەلەلەردى شەشۋدى تاپسىرعان بولاتىنمىن. مەكتەپتەردىڭ وقۋ كابينەتتەرىن جابدىقتاۋ، قۇرىلىسىن ۋاقتىلى جۇرگىزۋ، سىبايلاس جەمقورلىق تاۋەكەلدەرىنىڭ الدىن الۋ باعىتىندا جۇيەلى جۇمىس جالعاسۋى ءتيىس. ءبىلىم مەكەمەلەرىنە سيفرلىق جۇيەلەردى ەنگىزۋ بويىنشا ناقتى ۇسىنىس بەرىلىپ، ءتيىستى جۇمىس اتقارىلسىن. بولىنگەن قارجىنى دۇرىس يگەرىپ، ءتيىستى جۇمىستى ۋاقتىلى اتقارۋ كەرەك. ءبىز بۇل سالاداعى جۇمىستاردى قاتاڭ باقىلاۋدا ۇستايمىز، – دەگەن دارحان ساتىبالدى جاۋاپتى باسشىلارعا جۇكتەلگەن مىندەتتەردى ساپالى ورىنداۋدى جۇكتەدى.

تۇركىستان وبلىستىق ءبىلىم باسقارماسى باسشىسىنىڭ ورىنباسارى ايگۇل قاسىمبەكوۆانىڭ مالىمدەۋىنشە، بيىل  وبلىستاعى 107 ءبىلىم بەرۋ مەكەمەسىنىڭ جىلۋ جۇيەسى تابيعي گازعا اۋىستى. وعان ءبىلىم سالاسىنان ۇنەمدەلگەن بيۋدجەت قارجىسى ەسەبىنەن 2،2 ملرد. تەڭگە (79 مەكتەپكە – 1،85 ملرد. تەڭگە، 28 بالاباقشاعا – 350 ملن. تەڭگە) قارجى قارالعان. قازىرگى تاڭدا 107 مەكەمدەگى جۇمىس تولىق اياقتالىپ، مەكەمەلەر تابيعي گازعا قوسىلدى. ناتيجەسىندە تابيعي گازعا قوسىلعان ءبىلىم نىساندارىنىڭ سانى 800-گە جەتتى. بۇل جۇمىستار كومىرگە دەگەن سۇرانىستى 79 مىڭ تونناعا دەيىن تومەندەتىپ وتىر.

ال 2025 جىلى تاعى 100 ءبىلىم بەرۋ مەكەمەسىنىڭ جىلىتۋ جۇيەسىن قاتتى وتىننان (كومىر) تابيعي گازعا اۋىستىرۋ جوسپارلانۋدا. وعان بولجاممەن 2 ملرد. تەڭگە قارجى قاجەت. بۇل جۇمىستاردى ءبىلىم سالاسىنان ۇنەمدەلگەن بيۋدجەت قارجىسى ەسەبىنەن شەشۋ جوسپارلانىپ وتىر.

وبلىستا بالالاردىڭ بوس ۋاقىتتارىن ءتيىمدى ۇيىمداستىرۋ ماقساتىندا  ءىس-شارالار بەكىتىلىپ، ءتيىستى جۇمىس جالعاسۋدا. ناتيجەسىندە ەرتە جۇكتىلىك، جاسوسپىرىمدەر اراسىنداعى سۋيسيد پەن قىلمىس دەرەگىنىڭ تومەندەگەنى بايقالعان.

بالالار ءۇشىن 30 جازعى ساۋىقتىرۋ لاگەرى (9 مەملەكەتتىك، 21 جەكەمەنشىك) قىزمەت كورسەتتى.  جازعى ساۋىقتىرۋ جۇمىستارىن جۇيەلەۋ، لاگەرلەردى ورتالىقتاندىرۋ ارقىلى مەملەكەتتىك لاگەرلەردە جاز ماۋسىمىندا قوسىمشا 9 مىڭنان اسا بالانى قابىلداۋ كوزدەلۋدە.

جىل باسىندا مەملەكەتتىك تاپسىرىس ورنالاستىرىلعان 1432 مەكتەپكە دەيىنگى ءبىلىم بەرۋ ۇيىمدارىندا مونيتورينگ جۇرگىزىلدى. جالپى وبلىستاعى بالاباقشالاردا 155 992 بالا تاربيەلەنۋدە. مونيتورينگ ناتيجەسىندە مەكتەپكە دەيىنگى ۇيىمدار ەسەبىنە الىنعان كەيبىر بالالاردىڭ بالاباقشالارعا مۇلدەم كەلمەيتىنى جانە وعان ءبىلىم بولىمدەرى ارقىلى تولەم جۇرگىزىلگەنى انىقتالدى. انىقتالعان كەمشىلىكتەر بويىنشا وبلىستىق ءبىلىم باسقارماسى جانىنان قۇرىلعان كوميسسيا ماقساتسىز 7422 مەملەكەتتىك تاپسىرىستى قىسقارتۋ تۋرالى شەشىم قابىلداعان.

ماجىلىستە مەكتەپتەردى جاڭعىرتۋ جوباسىنا ەنگىزىلگەن ءبىلىم ۇيالارىن جوندەۋ، اسحانالارىن رەتتەۋ، وقۋ كابينەتتەرىن جابدىقتاۋ جانە وزگە دە ماسەلەلەر ايتىلىپ، ءتيىستى تاپسىرمالار  بەرىلدى.