الماتىدا نۇكتەلى قۇرىلىسقا بايلانىستى جاڭا داۋ تۋىندادى. وسى تۇستا، ءال-فارابي داڭعىلى بويىنداعى اكادەميالىق قالاشىق تۇرعىندارى پرەزيدەنتكە بەينەۇندەۋ جولدادى، دەپ حابارلايدى Dalanews.kz.
ايتۋلارىنشا، ولاردىڭ ۇيلەرىنىڭ الدىندا جاڭا تۇرعىن ءۇي كەشەنىن سالۋ جوسپارلانىپ وتىر. تۇرعىندار بۇل شەشىمگە قارسى شىعىپ، قۇرىلىستى توقتاتۋدى تالاپ ەتتى. ولار داۋلى جەر تەلىمىن مەملەكەت مەنشىگىنە قايتارىپ، ونىڭ ورنىنا دەمالىس ايماعىن مەن توتەنشە جاعداي كەزىندە جينالاتىن الاڭ سالۋدى ۇسىندى.
"بۇل تىنىش، ءقاۋىپسىز اۋدان ەدى. ءبىز دامۋعا قارسى ەمەسپىز، ءبىراق تىرشىلىككە قولايلى ورتانى تاعى ءبىر كوپقاباتتى ءۇي ءۇشىن قۇرتۋعا بولمايدى. بيلىك ءبىزدىڭ سوزىمىزگە قۇلاق اسسا دەيمىز"، — دەيدى تۇرعىندار.
ايتۋلارىنشا، جوسپارلانعان قۇرىلىس اۋماعىندا بىرنەشە ءقاۋىپ بار. ول اۋماق سەيسموقاۋىپتى ايماقتا، تەكتونيكالىق جارىق ۇستىندە ورنالاسقان. سونداي-اق قۇرىلىس اۋداننىڭ تابيعي جەلدەتىلۋىن قامتاماسىز ەتەتىن سوڭعى اشىق وتكەلدى جاۋىپ تاستاۋى مۇمكىن. بۇعان قوسا، جەردىڭ استىنان جوعارى ۆولتتى كابەلدەر وتەدى، ال ماڭايداعى ينجەنەرلىك ينفراقۇرىلىم ەسكىرگەن.
تۇرعىندار قوعامدىق تىڭداۋلاردىڭ وتكىزىلمەگەنىن جانە ەشكىمنىڭ قۇرىلىسقا رەسمي كەلىسىم بەرمەگەنىن ايتادى.
بەلگىلى بولعانداي، اتالعان جەر تەلىمى جەكە مەنشىك يەلىگىندە جانە ول سوڭعى جىلدارى بىرنەشە رەت قايتا ساتىلعان. تۇرعىنداردىڭ پىكىرىنشە، يەلەر مۇنى ايىپپۇل تولەمەۋ ءۇشىن ادەيى جاساعان.
اكادەمقالاشىق تۇرعىندارى اكيماتتان جەردى مەملەكەت مەنشىگىنە قايتارىپ، "وڭتۇستىك ساياباق" ىسىنە ۇقساس شەشىم قابىلداۋدى سۇرايدى.
"ءبىز ءوز قولىمىزبەن اعاش وتىرعىزىپ، اۋماقتى كوركەيتۋگە دايىنبىز. ەڭ باستىسى، اشىق كەڭىستىكتى ساقتاپ، كەيىن وكىنىش اكەلەتىن قاتەلىككە جول بەرمەۋ"، - دەيدى تۇرعىندار.
