كىتاپ شىعارۋ سالاسىنداعى سوڭعى تەندەنسيالار مەن وقىرمان سۇرانىسىن ەسكەرە وتىرىپ، adebiportal.kz وتاندىق ادەبي پورتالى اۆتورلاردىڭ اۋديوكىتاپ فورماتىنداعى جاڭا شىعارمالارىمەن تولىعۋدا، – دەپ حابارلايدى Ertenmedia.kz.
پورتالدىڭ جاڭالىعى – قاسىم-جومارت توقايەۆتىڭ «اكە تۋرالى وي-تولعاۋ» اۋديوكىتابى. كىتاپ قازاق ادەبيەتىندەگى دەتەكتيۆ جانرىنىڭ نەگىزىن قالاۋشى كەمەل توقايەۆتىڭ ءومىر جولىنا ارنالعان.
اۆتور اكەسىنىڭ ءومىرى مەن شىعارماشىلىعى تۋرالى جەكە ەستەلىكتەرىمەن ءبولىسىپ، كەمەل توقايەۆتىڭ قيىندىققا تولى بالالىق شاعى، ونىڭ مايدانداعى جاستىق كەزى مەن سوعىستان كەيىنگى شىعارماشىلىق جولى تۋرالى اڭگىمەلەيدى. اۆتور اناسى – تۇرار شاباربايەۆاعا ارنايى ءبولىم ارناعان. اناسى جازۋشىنىڭ ومىرلىك ادال سەرىگى، وتباسىنىڭ ۇيىتقىسى بولعانىن ايتادى. ءوزىنىڭ اتا-اناسىنا جانە جاقىندارىنا دەگەن سۇيىسپەنشىلىك سەزىمىن تەرەڭ جەتكىزەدى.
پرەزيدەنتتىڭ وتباسى قۇندىلىقتارى، بورىش پەن جاۋاپكەرشىلىك، اعا ۇرپاقتىڭ مۇراسى تۋرالى وي-تولعاۋلارى كىتاپتا ايقىن كورىنىس تاپقان. قاسىم-جومارت توقايەۆتىڭ بۇل تۋىندىدا بايانداعان شىنايى تولعانىستارى جاس ۇرپاق تاربيەسى ءۇشىن ءمانى تەرەڭ، ماڭىزى زور.
كەمەل توقايەۆ حح عاسىرداعى وتاندىق ادەبيەتتە جارقىن ءىز قالدىردى. شىعارمالارى قالامداستارى، سىنشىلار مەن وقىرمان تاراپىنان جوعارى باعالانىپ، قازاقستان مەن كەڭەس وداعىندا بەستسەللەرگە اينالدى.
پرەزيدەنتتىڭ اۋديوكىتابى Kitap.kz، Topiq.kz، Kazneb.kz قوسىمشالارىندا دا قولجەتىمدى بولادى.
جاقىن ۋاقىتتا ۇلى جەڭىستىڭ 80 جىلدىعىن مەرەكەلەۋ اياسىندا adebiportal.kz پورتالىندا قازاقستاندىق مايدانگەر-جازۋشىلاردىڭ اۋديوكىتاپتارى ورنالاستىرىلادى: باۋىرجان مومىش ۇلى «ارتىمىزدا موسكۆا، تاحاۋي احتانوۆ «قاھارلى كۇندەر»، ءابدىجامىل نۇرپەيىسوۆ «كۇتكەن كۇن»، ءازىلحان نۇرشايىقوۆ «اقيقات پەن اڭىز»، كەمەل توقايەۆ «سولدات الىسقا كەتتى»، قاسىم امانجولوۆ «اقىن ءولىمى تۋرالى اڭىز» جانە ت.ب.
