ماسكەۋدە مۇحتار ءابليازوۆتىڭ سىبايلاسى الەكساندر پوتكين (الەكساندر بەلوۆ لاقاپ اتىمەن دە بەلگىلى) سىرتتاي قاماۋعا الىندى. ول بتا بانك سالىمشىلارىنىڭ اقشاسىن ۇرلاپ، زاڭداستىرىپ العان دەگەن كۇدىككە ىلىنگەن بولاتىن، - دەپ حابارلايدى Dalanews.kz.
بۇل تۋرالى تاسس اگەنتتىگى جازدى.
پوتكينگە قىلمىستىق جولمەن الىنعان اقشانىڭ ءىزىن جاسىردى دەگەن ايىپ تاعىلعان. اڭگىمە ۇيىمداسقان توپتىڭ ارەكەتى تۋرالى بولماق. الەكساندر پوتكين 7 جىلعا دەيىن باس بوستاندىعىنان ايىرىلۋى مۇمكىن.
ال پوتكيننىڭ ادۆوكاتى ايىپ 2015 جىلى بولعان جايتپەن بايلانىستى دەپ سانايدى. سول جىلى ونىڭ قورعاۋشىسى ەكسترەميزم، ۇلتارالىق الاۋىزدىقتى قوزدىرعانى جانە اقشانى جىلىستاتقانى ءۇشىن سوتتا ءىستى بولدى. تەرگەۋ مالىمەتىنشە، ول بۇل اقشانى بتا بانك سالىمشىلارىنان ۇرلاعان.
پوتكينگە جاڭا ايىپ 2024 جىلدىڭ قاڭتارىندا تاعىلعان. ارتىنشا ءابليازوۆتىڭ سىبايلاسىنا فەدەرالدى، ارتىنشا حالىقارالىق ىزدەۋ جاريالانعان.
ەسكە سالايىق، ادۆوكات جان كۇنسەركين بانكير مۇحتار ءابليازوۆتىڭ ىسىنە قاتىستى جاڭا دەرەكتەر ايتقان بولاتىن.
كۇنسەركيننىڭ سوزىنشە، 19 ناۋرىزدا الماتىنىڭ مەدەۋ اۋدانىنداعى № 2 سوتتا ۇكىم شىعىپ، نۇرعازين قۋانىشتى بتا بانكتەگى قارجى جىمقىرۋ ءىسى بويىنشا ەسكىرۋ مەرزىمىنە بايلانىستى جازادان بوساتتى. ايتا كەتەيىك، قۋانىش نۇرعازين – مۇحتار ءابليازوۆتىڭ اعاسى.
"سوت قۋانىش ءنۇرعازيندى اقتامادى. ءبىراق ءىستى قاراۋ بارىسىندا بتا بانكتەگى باسقا ايىپتالۋشىلاردىڭ ىستەرى بويىنشا بۇرىن سوتتا زەرتتەلمەگەن كەيبىر مالىمەتتەر انىقتالدى. بانك اكسيالارىنىڭ 62 پايىزى ءابلازوۆ مۇحتارعا تيەسىلى ەكەنى بەلگىلى بولدى. ياعني، ونىڭ 2017 جىلى ءوز اقشاسىن ۇرلاعانى ءۇشىن قالاي كىنالى دەپ تانىلعانى ءقازىر مۇلدەم تۇسىنىكسىز"، – دەيدى ادۆوكات الەۋمەتتىك جەلىدەگى پاراقشاسىندا.
قازاقستاندا مۇحتار ءابليازوۆ قىلمىستىق قوعامداستىق قۇرىپ، بتا بانكتەن 7،5 ميلليارد دوللاردان اساتىن قاراجاتتى ۇرلاعانى ءۇشىن كىنالى دەپ تانىلدى. ەكس-بانكير ەلىمىزدە ەكسترەميستىك ۇيىم دەپ تانىلعان، تىركەلمەگەن "قازاقستاننىڭ دەموكراتيالىق تاڭداۋى" قوزعالىسىنىڭ جەتەكشىسى.
