تۇركىستان قالاسىندا تۇركىستان وبلىسى ءبىلىم بەرۋ ۇيىمدارىنىڭ باسشىلىق قۇرامى مەن مۇعالىمدەرىنە ارنالعان «ءبىلىم الۋشىلاردا پاندىك جانە سيفرلىق قۇزىرەتتىلىكتەردى، فۋنكسيونالدىق ساۋاتتىلىقتى جانە يكەمدى داعدىلاردى قالىپتاستىرۋ» بىلىكتىلىگىن ارتتىرۋ كۋرسى اياسىندا پلەنارلىق وتىرىس ءوتتى.
پلەنارلىق وتىرىسقا ق ر عىلىم جانە جوعارى ءبىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ ءتوراعا ورىنباسارى گۋلجان دجاراسوۆا، اباي اتىنداعى قازۇپۋ رەكتورى بولات تىلەپ، تۇركىستان وبلىسى اكىمىنىڭ ورىنباسارى بەيسەنباي تاجىبايەۆ، تۇركىستان وبلىسى ءبىلىم باسقارماسىنىڭ وكىلدەرى، وڭىردەگى ءبىلىم بەرۋ ۇيىمدارىنىڭ باسشىلارى مەن مۇعالىمدەرى قاتىستى.
رەكتور بولات تىلەپ اباي ۋنيۆەرسيتەتىنىڭ قىزمەتى مەن جەتىستىكتەرىنە توقتالىپ، جالپى ءبىلىم بەرۋ سالاسىنداعى كادرلار تاپشىلىعى ماسەلەسىن جويۋعا، سونداي-اق جاڭا فورماسياداعى پەداگوگ كادرلاردى دايارلاۋعا، پەداگوگتەردىڭ بىلىكتىلىگىن ارتتىرۋعا جانە قايتا دايارلاۋعا باعىتتالعان ۋنيۆەرسيتەتتىڭ باستامالارى تۋرالى ەگجەي-تەگجەيلى ايتىپ بەردى.
ءبىلىم ساپاسىن ارتتىرۋ ءۇشىن پەداگوگتار مەن ءبىلىم بەرۋ ۇيىمدارىنىڭ باسشىلارىن قايتا دايارلاۋ مەن بىلىكتىلىگىن ارتتىرۋدىڭ ماڭىزدىلىعىنا ەرەكشە نازار اۋدارىلدى. مۇنداي باستامالار ءبىلىم بەرۋدىڭ زاماناۋي ادىستەرىن ەنگىزۋگە جانە بولاشاق مامانداردى دايارلاۋ ءۇشىن قاجەتتى كاسىبي قۇزىرەتتىلىكتەردى دامىتۋعا ىقپال ەتەتىنى اتاپ ءوتىلدى. بۇل ءوز كەزەگىندە جالپى ءبىلىم بەرۋ جۇيەسىنە، ونىڭ ساپاسىنا وڭ اسەرىن تيگىزەدى.
ءىس-شارا بارىسىندا وقۋ ۇدەرىسىنە سيفرلىق تەحنولوگيالاردى ەنگىزۋ، وقۋشىلاردىڭ فۋنكسيونالدىق ساۋاتتىلىعىن ارتتىرۋ ادىستەرى، سونىمەن قاتار زاماناۋي ءبىلىم بەرۋ جاعدايىندا قاجەتتى داعدىلاردى دامىتۋ سياقتى وزەكتى ماسەلەلەر تالقىلاندى. وسكەلەڭ ۇرپاقتىڭ ءبىلىم ساپاسى مەن ساۋاتتى تۇلعا بولىپ قالىپتاسۋى ۇستازداردىڭ كاسىبي شەبەرلىگى مەن بىلىكتىلىگىنە تىكەلەي بايلانىستى ەكەندىگىنە ەرەكشە نازار اۋدارىلدى.
پلەنارلىق سەسسيا اياسىندا اباي اتىنداعى قازۇپۋ پروفەسسورلارى: ق ر ۇعا اكادەميگى الما ءابىلقاسىموۆا «سيفرلىق تەحنولوگيالار ورتا مەكتەپ پەن جوعارى پەداگوگيكالىق وقۋ ورنىندا ماتەماتيكالىق ءبىلىم بەرۋدىڭ ساباقتاستىعىنىڭ فاكتورى رەتىندە» تاقىرىبىندا، پەداگوگيكالىق عىلىمدار اكادەمياسىنىڭ پرەزيدەنتى، اكادەميك اسقاربەك قۇسايىنوۆ «ۇستاز قۇزىرەتى – ءبىلىم ساپاسىنىڭ قاينار كوزى» تاقىرىبىندا مازمۇندى بايانداما جاساپ، ءوز تاجىريبەلەرىمەن ءبولىستى.
ايتا كەتۋ كەرەك، 6-7 ماۋسىمدا اباي اتىنداعى قازۇپۋ وكىلدەرى بىلىكتىلىكتى ارتتىرۋ كۋرستارىن وتكىزدى، وعان تۇركىستان وبلىسىنىڭ جالپى ءبىلىم بەرۋ مەكەمەلەرىنەن 150-دەن استام تىڭداۋشى قاتىستى. اتالعان ءىس-شارا تۇركىستان وبلىسىنىڭ جالپى ءبىلىم بەرۋ ۇيىمدارى باسشىلارى مەن پەداگوگتارىنىڭ بىلىكتىلىگى مەن كاسىبي قۇزىرەتتىلىگىن جوسپارلى تۇردە ارتتىرۋ ماقساتىندا اباي ۋنيۆەرسيتەتىنىڭ باستاماسىمەن تۇركىستان وبلىسى اكىمدىگىنىڭ قولداۋىمەن ۇيىمداستىرىلدى.
بۇل باستاما مۇعالىمدەردىڭ كاسىبي شەبەرلىگىن شىڭداۋدا جاڭا سەرپىن بەرىپ، ءبىلىم ساپاسىن ارتتىرۋعا جانە ءبىلىم بەرۋدىڭ زاماناۋي ادىستەرىن ەنگىزۋگە ىقپال ەتتى.
ءىس-شارا ناتيجەسىندە اباي ۋنيۆەرسيتەتى مەن تۇركىستان وبلىسىنىڭ اكىمدىگى اراسىندا ءوزارا ىنتىماقتاستىق تۋرالى كەلىسىم جاسالدى.
