بۇگىن ايماق باسشىسى بەرىك ءۋالي سەمەي قالاسىنداعى سوعىس ارداگەرلەرىن ۇلى جەڭىستىڭ 80 جىلدىعىمەن قۇتتىقتادى،- دەپ حابارلايدى Dalanews.kz
وبلىس اكىمى اۋەلى 104 جاستاعى سوعىس ارداگەرى، «حالىق قاھارمانى» ءابدىعالي ءقايمولديننىڭ شاڭىراعىنا باردى. ءابدىعالي قايمولدين 1941 جىلى اسكەر قاتارىنا شاقىرىلىپ، 1945 جىلدىڭ 9 مامىرىنا دەيىنگى ارالىقتا ستالينگراد، 1-ۋكراينا، 1-بەلارۋس، 3-بالتىق مايداندارىنا قاتىسادى. حاركوۆتى ازات ەتۋگە اتسالىسادى.
2023 جىلى مەملەكەت باسشىسى قاسىم-جومارت توقايەۆتىڭ جارلىعىمەن 1941–1945 جىلدارداعى ۇلى وتان سوعىسىندا كورسەتكەن ەرلىگى، باتىلدىعى، جانقيارلىعى مەن سوعىستان كەيىن مەملەكەتتىك جانە قوعامدىق قىزمەتكە بەلسەندى قاتىسقانى ءۇشىن «حالىق قاھارمانى» اتاعىن بەرىلىپ، ايرىقشا ەرەكشەلىك بەلگىسى – التىن جۇلدىز جانە «وتان» وردەنىمەن ماراپاتتالدى.
ال 99 جاستاعى سوعىس ارداگەرى يۆان شيەۆسوۆ پولشا مەن چەحوسلوۆاكياداعى شايقاستارعا قاتىسقان. II دارەجەلى «ۇلى وتان سوعىسى»، «قىزىل جۇلدىز» وردەندەرىمەن ماراپاتتالعان.
ايماق باسشىسى قوس ارداگەردى مەرەكەمەن قۇتتىقتاپ، پرەزيدەنتتىڭ جولداعان قۇتتىقتاۋىن وقىپ بەردى. مەرەيتويلىق مەدال، 5 ميلليون تەڭگەنىڭ سەرتيفيكاتى مەن وبلىس اكىمدىگىنىڭ ارنايى سىيلىعىن تابىس ەتتى.
«سىزدەردى ۇلى جەڭىستىڭ 80 جىلدىعىمەن شىن جۇرەكتەن قۇتتىقتايمىن! بۇل – حالقىمىزدىڭ ەرلىگى مەن باتىرلىعىنىڭ نىشانىنا اينالعان قاستەرلى مەرەكە. وزدەرىڭىز جاقسى بىلەسىزدەر، مەملەكەت باسشىسى سوعىس ارداگەرلەرىنە ءاردايىم ەرەكشە قۇرمەتپەن قارايدى. سىزدەردىڭ وتانعا دەگەن شەكسىز سۇيىسپەنشىلىكتەرىڭىز بەن جانقيارلىق ەرلىكتەرىڭىز ۇرپاققا ۇلگى بولا بەرەدى. ارامىزدا امان-ەسەن جۇرگەندەرىڭىز ءبىز ءۇشىن ۇلكەن قۋانىش، زور مارتەبە. ءبىز سىزدەرمەن ءارقاشان ماقتانامىز»، - دەدى ايماق باسشىسى.
ەرەكشە اتاپ وتەرلىگى، سوعىس ارداگەرلەرىنىڭ ءۇيىنىڭ اۋلاسىندا ۇلتتىق ۇلاننىڭ 5511 اسكەري ءبولىمىنىڭ وركەسترى سوعىس جىلدارىنىڭ اندەرىن شىرقادى.
قازىرگى تاڭدا اباي وبلىسىندا ءۇش سوعىس ارداگەرى، 1700-گە جۋىق تىل ەڭبەككەرى بار.
