اباي وبلىسىندا جاڭا كونستيتۋسيانى قابىلداۋ جونىندەگى رەسپۋبليكالىق رەفەرەندۋمعا داۋىس بەرۋ جالعاسىپ جاتىر، دەپ حابارلايدى Dalanews.kz.
وبلىس اكىمى بەرىك ءۋالي سەمەي قالاسىنداعى مەديسينالىق ۋنيۆەرسيتەت عيماراتىندا ورنالاسقان №93 رەفەرەندۋم ۋچاسكەسىنە بارىپ، ءوز تاڭداۋىن جاسادى. ايماق باسشىسى بۇل كۇننىڭ ەل ءۇشىن ماڭىزى ەرەكشە ەكەنىن اتاپ ءوتىپ، اباي ەلىنىڭ جۇرتشىلىعى ازاماتتىق بەلسەندىلىك تانىتاتىنىنا سەنىم ءبىلدىردى.
وبلىس اۋماعىندا بارلىعى 465 رەفەرەندۋم ۋچاسكەسى جۇمىس ىستەپ جاتىر. ونىڭ – 429-ى اشىق، 36-سى – جابىق ۋچاسكە. وبلىس بويىنشا 400 151 سايلاۋشى داۋىس بەرۋگە قۇقىلى. اشىق ۋچاسكەلەردىڭ بارلىعىندا تۇرعىندار ءۇشىن مادەني ءىس-شارالار، جارمەڭكەلەر مەن ءتۇرلى اكسيالار ۇيىمداستىرىلعان.
رەفەرەندۋم ۋچاسكەلەرىندە داۋىس بەرۋشىلەرگە قولايلى جاعداي جاسالعان. ۋچاسكەلەر قاجەتتى ينفراقۇرىلىممەن جابدىقتالىپ، داۋىس بەرۋ پروسەسى بەلگىلەنگەن تارتىپپەن وتۋدە. ۋچاسكەلەردە پاندۋستار ورناتىلىپ، ارنايى كورسەتكىشتەر مەن ىڭعايلى داۋىس بەرۋ كابينالارى قاراستىرىلعان. قاجەت بولعان جاعدايدا ۋچاسكەلىك كوميسسيا مۇشەلەرى ازاماتتارعا اقپاراتتىق كومەك كورسەتەدى. دەنساۋلىعىنا بايلانىستى ۋچاسكەگە كەلە المايتىن ازاماتتار ءۇشىن تاسىمالدى جاشىك ارقىلى ۇيدە داۋىس بەرۋ مۇمكىندىگى ۇيىمداستىرىلعان. وڭىردە 2164 مۇمكىندىگى شەكتەۋلى ازاماتتىڭ دەرەكتەرى ناقتىلانىپ، ولاردىڭ قاي ۋچاسكەگە تىركەلگەنى تەكسەرىلگەن.
رەفەرەندۋمدى وتكىزۋگە وڭىردە ءبىر وبلىستىق، ەكى قالالىق، 10 اۋداندىق جانە 465 ۋچاسكەلىك كوميسسيا قاتىسۋدا. كوميسسيالاردىڭ قۇرامىندا 3254 ادام جۇمىس ىستەيدى. دايىندىق كەزەڭىندە ولاردىڭ بارلىعى ارنايى وقىتۋدان ءوتتى.
وبلىستا بۇگىن 28 ينۆاتاكسي جۇمىس ىستەيدى. ونىڭ ىشىندە سەمەي قالاسىندا 21 ارنايى كولىك قىزمەت كورسەتەدى. بۇدان بولەك 6 سۋردواۋدارماشى جانە الەۋمەتتىك قىزمەتكەرلەر تارتىلعان.
