"قازاۆتوجول" ۇلتتىق كومپانياسىنىڭ ماماندارى اباي وبلىسىندا ءتۇنى بويى قار قۇرساۋىندا قالعانداردى قۇتقارىپ الەك. ولار 60-تان استام اۆتوكولىكتى جولعا سالعان. دەگەنمەن كەپتەلىستە تۇرعاندار ءالى دە كوپ، دەپ حابارلايدى Dalanews.kz.

ۇلتتىقكومپانيا باسپا ءسوز قىزمەتىنىڭ حابارلاۋىنشا، تۇندە ساعات 23:00 دەن باستاپ "الماتى - تالدىقورعان - وسكەمەن" تاس جولىنىڭ تاسكەسكەن اۋىلىنا بۇرىلىس پەن اياگوز قالاسى ارالىعىندا جۇك كولىكتەرى ءۇشىن، ارتىنشا جەڭىل كولىكتەر ءۇشىن دە جول جابىلعان.

"الايدا اتالعان ۋچاسكەدە ۇدەتە سوققان بوران كەزىندە جولعا شىعىپ ۇلگەرگەن 100 دەن استام كولىك تۇرىپ قالعان. "قازاۆتوجول" ۇلتتىق كومپانياسىنىڭ 20-عا جۋىق اۋىر تەحنيكاسى ءتۇنى بويى قۇتقارۋ جۇمىستارىن جالعاستىرىپ جاتىر. قاتتى بوران تاس جولدى تولىق تازالاۋعا مۇرشا بەرمەي تۇر. جولدا قالعا 3 جولاۋشى اۆتوبۋسى اياگوز قالاسىنا جەتكىزىلگەن. 77 ادام، ونىڭ ىشىندە 3 بالا جىلىتۋ پۋنكتىنە ورنالاستىرىلدى. تاسكەسكەن اۋىلىنا بۇرىلىس پەن اياگوز ارالىعى ءالى دە جابىق. تاسكەسكەن جاعىندا 90 جۇك، 40 جەڭىل كولىك پەن 4 اۆتوبۋس جولدىڭ اشىلۋىن توسىپ تۇر. اياگوز جاقتان دا جولعا شىعىپ، قاتىناستىڭ قالىپىنا كەلۋىن كۇتىپ 120-دان استام كولىك كۇتۋدە"، دەلىنگەن شۇعىل حابارلامادا.

كوكتەم شىقتى دەگەنمەن، قىس ءالى دە مىنەز كورسەتىپ تۇر. سوندىقتان، ۇلتتىق وپەراتور ماماندارى جولعا شىقپاس بۇرىن 1403 بايلانىس ورتالىعىنا حابارلاسىپ، تاۋلىك بويى جولدىڭ اشىقتىعى جايلى اقپارات الۋعا كەڭەس بەرەدى.