سەمەي قالاسىنداعى وبلىستىق تاريحي-ولكەتانۋ مۋزەيىندە ۇلتتىق دومبىرا كۇنىنە ارنالعان «ۇلى دالا ءۇنىسىڭ سەن، دومبىرا!» اتتى كورمە ۇيىمداستىرىلدى، - دەپ حابارلايدى Dalanews.kz
اتالۋلى شارا ۇلتتىق دومبىرا كۇنىن كەڭىنەن ناسيحاتتاۋعا جانە قازاق حالقىنىڭ ءتول ونەرى مەن مادەني مۇراسىن دارىپتەۋگە باعىتتالعان.
كورمەنىڭ نەگىزگى ماقساتى – ولكەتانۋ مۋزەيىنىڭ قورىندا ساقتالعان، ەلىمىزدىڭ بەلگىلى اقىندارى مەن ونەر قايراتكەرلەرىنە تيەسىلى جەكە دومبىرالار ارقىلى قازاق حالقىنىڭ ۇلتتىق رۋحاني مۇراسىن كەڭىنەن تانىستىرۋ، دومبىرانىڭ ونەر مەن مادەنيەتتەگى ەرەكشە ورنىن ايشىقتاۋ.
كورمە بارىسىندا كەلۋشىلەر تاريحي تۇلعالار پايدالانعان دومبىرالارمەن تانىسىپ، ولاردىڭ شىعارماشىلىق جولى مەن مادەنيەتكە قوسقان ۇلەسى تۋرالى مول ماعلۇمات الدى. ەكسپوزيسيادا ۇلتتىق اسپاپتىڭ ءارتۇرلى ۇلگىلەرى مەن ەرەكشەلىكتەرى كورسەتىلىپ، دومبىرانىڭ قازاق كۇي ونەرى مەن ءان داستۇرىندەگى ماڭىزى ايتىلدى.
- ۇلتتىق دومبىرا كۇنى – حالقىمىزدىڭ رۋحاني بايلىعىن، ءتول ونەرىن ۇلىقتايتىن مەرەكە. بۇگىنگى ۇيىمداستىرىلىپ وتىرعان «ۇلى دالا ءۇنىسىڭ سەن، دومبىرا!» اتتى كورمەنىڭ ماقساتى – قازاقتىڭ كيەلى اسپابى ارقىلى ۇلتتىق مادەنيەتتى ناسيحاتتاۋ. بۇل كورمە – ءبىر عانا مۋزىكالىق اسپاپتى كورسەتۋ ەمەس، بۇل – تۇتاس ءبىر داۋىرلەردىڭ، تاريحي تۇلعالاردىڭ رۋحىن سەزىندىرۋ، جاستارعا ونەگە بەرۋ. اتا-بابالاردان ميراس بولعان اسىل ونەر ارقىلى ءبىز جاس ۇرپاقتىڭ بويىنا ۇلتتىق قۇندىلىقتاردى سىڭىرە الامىز. دومبىرا – حالقىمىزدىڭ ءۇنى، شەجىرەسى، تەكتىلىگىنىڭ نىشانى. وسىنداي رۋحاني-مادەني شارالار ارقىلى ءبىز ءتول ونەرىمىزگە دەگەن قۇرمەتىمىزدى كورسەتەمىز. كورمەگە ارنايى كەلىپ، اتاقتى كۇيشىلەر مەن ونەر ساڭلاقتارىنىڭ دومبىرالارىن كورۋگە كەلگەن بارشا جۇرتشىلىققا العىسىمدى بىلدىرەمىن، – دەپ اتاپ ءوتتى سەمەي قالاسىنىڭ وبلىستىق تاريحي-ولكەتانۋ مۋزەيىنىڭ ديرەكتورى قايرات سابىربايەۆ.
كورمەگە اباي ءداستۇرىنىڭ جالعاستىرۋشىلارى ساپارعالي الىمبەتوۆ، تاڭىربەرگەن امىرەنوۆ، ءدۇلدۇل انشىلەر جانىبەك كارمەنوۆ، بولات سىبانوۆ، كەلدەنباي ولمەسەكوۆ، مەيرامبەك احمەتوۆ، كەنتاۋ نازاربەك، بەرىك وماروۆ، اقىندار اقىلبەك مانابايەۆ، دامەتكەن وماربايەۆا، ابايدىڭ جيەنى بالتابەك ەرسالىموۆ، كومپوزيتور ءارى كۇيشى راحىمبەك نوعايبايەۆ، بەلگىلى عالىم امانتاي يسين جانە باسقا دا ونەر قايراتكەرلەرىنىڭ دومبىرالارى قويىلدى.
