وبلىس اكىمى بەرىك ءۋالي ايماق تۇرعىندارىنا ارنايى ۇندەۋ جاساپ، جالپىوڭىرلىك تازالىق اكسياسىنىڭ باستالاتىنىن جاريالادى، دەپ حابارلايدى Dalanews.kz 

ايماق باسشىسى «تازا قازاقستان» باعدارلاماسى اياسىندا وتەتىن تازالىق شاراسى ءبىر رەتتىك اكسيا ەمەس، جىل بويى جالعاساتىنىن اتاپ ءوتتى.

«تۋعان جەرىمىزدىڭ تۇلەگەنى، تۇرعان ورتامىزدىڭ كىرشىكسىز بولعانى، ەڭ الدىمەن، وزىمىزگە كەرەك. وبلىسىمىزدىڭ تازالىعى – اكىمدىك پەن كوممۋنالدىق قىزمەتتىڭ عانا ەمەس، ءاربىر ازاماتتىڭ، ءاربىر وتباسىنىڭ جاۋاپكەرشىلىگى» دەدى وبلىس اكىمى ۇندەۋىندە.

باستاما اياسىندا ارنايى بايقاۋ جاريالانادى. تازالىق جاناشىرلارى «ۇزدىك اۋدان»، «ۇزدىك اۋىل»، «ۇزدىك اۋلا»، «ۇزدىك ۋنيۆەرسيتەت»، «ۇزدىك كوللەدج»، «ۇزدىك مەكتەپ»، «ۇزدىك بالاباقشا»، «ۇزدىك كوشە»، «ۇزدىك مەكەمە» نوميناسيالارى بويىنشا ماراپاتتالادى. جەڭىمپازدارعا قوماقتى سىيلىقتار تاعايىندالادى.

وبلىستا اباتتاندىرۋ، جولداردى، اۋلالاردى، ساياباقتاردى جوندەۋ، قوعامدىق كولىكتەردى جاڭارتۋ جۇمىسى جالعاسادى. بيىل وڭىردە 400 شاقىرىم جول جوندەلىپ، «اۋىل – ەل بەسىگى» باعدارلاماسى اياسىندا 223 شاقىرىم جول قايتا جاڭعىرتىلادى. 77 مىڭ ءتۇپ اعاش ەگىلەدى. سەمەي قالاسىندا 22 اۋلانى اباتتاندىرۋ جوسپارلانعان. ونىڭ 11ء-ى سول جاعالاۋدا، 11ء-ى وڭ جاعالاۋدا.

بۇدان بولەك وبلىس ورتالىعىندا 210 اۆتوبۋس ايالداماسى ورناتىلادى. 60 جاڭا اۆتوبۋس قالا كوشەلەرىنە شىعادى. شاھار جولدارىن تازالاۋ ءۇشىن مەردىگەر كومپانيالار ءتۇرلى تيپتەگى 10 ارنايى تەحنيكا ساتىپ الدى. الداعى ۋاقىتتا دا ولاردىڭ سانى كوبەيەدى.

سونداي-اق بيىل سەمەيدەگى 10، اۋداندارداعى 100-گە جۋىق كوشە جارىقتاندىرىلادى. وبلىس اكىمى ءوڭىر ۇلى ابايدىڭ 180 جىلدىعىنا ازىرلەنىپ جاتقانىن، مەرەيتويدى لايىقتى دەڭگەيدە اتاپ ءوتۋ كەرەكتىگىن ايتتى.

ايماق باسشىسى بيزنەس وكىلدەرىن، ىرگەلى وقۋ ورىندارىن، جاستار مەن ەرىكتىلەردى، كاسىپورىندار مەن ۇيىمداردى يگى باستاماعا بەلسەندى اتسالىسۋعا شاقىردى.