استانادا جەدەل جاردەم كولىكتەرىن زاماناۋي بەينەباقىلاۋ جۇيەلەرىمەن جابدىقتاۋ جوباسى باستالدى. بۇل باستاما دارىگەرلەر مەن پاسيەنتتەردىڭ قاۋىپسىزدىگىن قامتاماسىز ەتۋگە باعىتتالعان،- دەپ حابارلايدى Dalanews.kz
سوڭعى 3 جىلدا ەلوردادا جەدەل جاردەم بريگادالارىنا 66 رەت شابۋىل جاسالعان. وسىعان بايلانىستى قالا اكىمدىگى بارلىق سانيتارلىق اۆتوكولىكتى بەينەتىركەۋ كەشەندەرىمەن جابدىقتاۋ تۋرالى شەشىم قابىلدادى.
«قازىرگى تاڭدا بارلىق دەڭگەيدە مەديسينا قىزمەتكەرلەرىنىڭ قىزمەت بارىسىندا قاۋىپسىزدىگىن قامتاماسىز ەتۋگە ۇلكەن كوڭىل بولىنۋدە. بۇگىندە العاشقى كولىك ءتورت كامەرامەن، GSM ءمودۋلى بار بەينەتىركەۋ قۇرىلعىسىمەن جانە بەينەنى ناقتى ۋاقىت رەجيمىندە جەتكىزەتىن مونيتورىمەن جابدىقتالدى. بەينەاعىن جەدەل جاردەم ديسپەچەرلىك قىزمەتىنە دە، پوليسيا دەپارتامەنتىنىڭ جەدەل باسقارۋ ورتالىعىنا دا جەتكىزىلەدى. بۇل توتەنشە جاعدايلارعا جەدەل ارەكەت ەتۋگە جانە كولىك ىشىندە دە، سىرتىندا دا بولىپ جاتقان جاعدايدى باقىلاۋعا مۇمكىندىك بەرەدى»، – دەپ حابارلادى قالالىق قوعامدىق دەنساۋلىق ساقتاۋ باسقارماسى.
جىل سوڭىنا دەيىن 100 جەدەل جاردەم كولىگىن بەينەباقىلاۋ جۇيەلەرىمەن جابدىقتاۋ جوسپارلانىپ وتىر.
جوباعا قاتىستى پىكىرىن قالالىق جەدەل مەديسينالىق جاردەم قىزمەتىنىڭ وكىلدەرى دە ءبىلدىردى. استانا قالالىق جەدەل مەديسينالىق جاردەم ستانسياسى ديرەكتورىنىڭ ورىنباسارى ارمان بايانبايەۆ ۇجىم كورسەتىلىپ وتىرعان قولداۋعا ريزاشىلىقپەن قارايتىنىن اتاپ ءوتتى.
«بۇل جوبا مەديسينا قىزمەتكەرلەرى مەن ناۋقاستاردىڭ قاۋىپسىزدىگىن ارتتىرۋعا جاسالعان ماڭىزدى قادام. سونىمەن قاتار، اتالعان تەحنولوگيا جەدەل جاردەم كولىكتەرىنىڭ قاتىسۋىمەن بولاتىن جول-كولىك وقيعالارىنىڭ ازايۋىنا وڭ اسەر ەتەدى»، – دەدى ول.
اتالعان باستاما استانا قالاسىنىڭ «سيفرلاندىرۋ جانە مەملەكەتتىك قىزمەتتەر باسقارماسى» مەملەكەتتىك مەكەمەسىنىڭ قولداۋىمەن جۇزەگە اسىرىلۋدا.
ەسكە سالا كەتەيىك، مەديسينا قىزمەتكەرلەرىنە جاسالعان شابۋىلدار جيىلەپ كەتكەننەن كەيىن مەملەكەت باسشىسى ولاردىڭ قاۋىپسىزدىگىن كۇشەيتۋدى جانە قۇقىقتارىن قورعاۋدى تاپسىرعان بولاتىن.
