چەحيا استاناسى پراگادا باستالعان «Mongol Rally» حالىقارالىق اۆتوەكسپەديسياسى وسكەمەندە اياقتالدى،- دەپ حابارلايدى Dalanews.kz
13 شىلدەدە پراگادان جولعا شىققان اۆتوەكسپەديسيا قاتىسۋشىلارى 10 مىڭ شاقىرىمنان استام جول ءجۇرىپ، ونداعان ەلدى باسىپ ءوتتى. بۇل مارافوننىڭ باستى ەرەكشەلىگى — تەحنيكاعا قويىلاتىن تالاپتاردا. ءار اۆتوكولىك 30 جىلدان ەسكى، شاعىن كولەمدى جانە الىس ساپارلارعا جارامسىز بولۋى ءتيىس. قاتىسۋشىلار GPS پەن ۇيىمداستىرۋشىلاردىڭ كومەگىنسىز جولسىز جەرلەردى، ءشول مەن تاۋدى ءوز كۇشتەرىمەن ەڭسەرىپ شىقتى.
اۆتوەكسپەديسياعا ەۋروپا، اقش، كانادا، اۆستراليا مەن پۋەرتو-ريكو سىندى 30 ەلدەن كەلگەن 100-دەن استام كوماندا قاتىستى. جولدا تەحنيكالىق اقاۋلارعا بايلانىستى كەيبىرى مەجەلى جەرگە جەتە المادى.
وسىلايشا، وسكەمەنگە شامامەن 80 كوماندا كەلىپ جەتىپ، شاھار تۇرعىندارى ەرەكشە اسەرلى فينالدىڭ كۋاسى بولدى.
— قاتىسۋشىلار ءۇشىن بۇل جاي عانا سپورت ەمەس، ناعىز رۋحاني ەكسپەديسيا. ال وسكەمەن ءۇشىن — ءوزىن الەمدىك دەڭگەيدە تانىتىپ، ءوڭىردىڭ سۇلۋلىعىن كورسەتۋگە زور مۇمكىندىك، — دەدى شقو تۋريستىك اقپارات ورتالىعى باسشىسىنىڭ ورىنباسارى تالعات داۋلەتوۆ.
ايتا كەتەيىك، اۆتوشەرۋ بارىسىندا جينالعان قاراجاتتىڭ ءبىر بولىگى قايىرىمدىلىققا باعىتتالماق
— قاتىسۋشىلاردىڭ باسىم بولىگى — ۇلىبريتانيادان. 273 ادامنىڭ 82ء-سى سول ەلدەن. ءبىز لوندوننان كەلىپ، شىعىس قازاقستان سياقتى اسەم وڭىرگە جەتكەنىمىزگە قۋانىشتىمىز. بۇل ناعىز شىتىرمانعا تولى ساپار بولدى. ءبىزدىڭ كولىكتەر — اسبەن ەسكىركەن، توت باسقان، ءارى موتور داۋىسى قاتتى شىعادى. ءبىراق ءاربىر شاقىرىم ۇمىتىلماستاي ەستە قالدى، — دەيدى بريتاندىق قاتىسۋشىلاردىڭ ءبىرى.
