تۇركىستان قالاسىن تازا اۋىز سۋمەن قامتاماسىز ەتۋ ماقساتىندا سالىنعان جاڭا نىساننىڭ قۇرىلىسى اياقتالدى. «تۇركىستان سۋ ارناسى» مەكەمەسى 200 مىڭعا جۋىق حالقى بار شاھاردى 100 پايىز ورتالىقتاندىرىلعان اۋىز سۋمەن قامتاماسىز ەتۋگە قاۋقارلى. ازىرگە بۇل مۇمكىندىك حالىقتىڭ 20%-ى عانا بار. وبلىس اكىمى ءومىرزاق شوكەيەۆ جاڭا ستراتەگيالىق نىساننىڭ جۇمىسىمەن تانىسىپ، جاۋاپتى سالا باسشىلارىنا تاپسىرمالار جۇكتەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

قۇرىلىس بارىسىندا 25 مىڭ شاقىرىمنان استام قۇبىر تارتىلىپ، تۇركىستان قالاسىنداعى ورتالىق سۋ قويماسىنا قوسىمشا 5000 م3 رەزەرۆۋارلار سالىنعان. قالاداعى بارلىق ەسكى جانە جاڭادان بوي كوتەرگەن عيماراتتارعا كارىز جۇيەسى جۇرگىزىلدى.

جاڭا سۋ ارناسى تولىق زاماناۋي تەحنيكامەن جابدىقتالعان. ەنەرگيا ۇنەمدەيتىن جوعارى تەحنولوگيالىق قوندىرعىلار قويىلعان سۋ شارۋاشىلىعى قالانى سۋمەن جابدىقتاۋ جانە سۋ بۇرۋ جۇيەسى ارقىلى ءتيىمدى قامتاماسىز ەتۋگە باعىتتالعان ءىرى وپەراتورعا اينالۋعا بار مۇمكىندىگى بار.

تۇركىستان قالاسىن ۇزدىكسىز سۋمەن قامتاماسىز ەتەتىن جاڭا مەكەمە – تولىق اۆتوماتتاندىرىلعان ۇلكەن وندىرىستىك كەشەن. ۇڭعىمالار ارقىلى قۋاتتى سورعىلار كوپ مەترلىك تەرەڭدىكتەن ءتىرى ىلعالعا يە بولادى جانە ونى ماگيسترالدى سۋ قۇبىرىنا بەرەدى.

زارارسىزداندىرىلعان، تازا اۋىز سۋمەن حالىقتى قامتاماسىز ەتەتىن جاڭا سۋ ارناسىندا سۋ شىعىنى تولىق باقىلاۋدا. سورعىلاردىڭ جاي-كۇيى، سۋ كولەمى، قۇبىرداعى قىسىم جانە باسقا دا ارنايى پارامەترلەر تۋرالى دەرەكتەر ديسپەچەرلىك بەكەتتىڭ مونيتورلارىندا كورسەتىلەدى.