ق ر ۇكىمەتى باسپا ءسوز قىزمەتىنىڭ حابارلاۋىنشا، مەملەكەت باسشىسى قاسىم-جومارت توقايەۆتىڭ تاپسىرماسى بويىنشا ازىرلەنگەن استانانىڭ نەگىزگى قالا قۇرىلىسى قۇجاتى قوعامدا كەڭىنەن تالقىلاۋدان ءوتتى. وندا حالىق سانىنىڭ قارقىندى ءوسۋىن ەسكەرە وتىرىپ، قالانى قارقىندى دامىتۋ شارالارى قاراستىرىلعان. بۇگىنگى تاڭدا ەلوردا تۇرعىندارىنىڭ سانى شامامەن 1،2 ملن ادامدى قۇرايدى، 2035 جىلعا قاراي اتالعان كورسەتكىش 2،3 ملن ادامعا جەتەدى دەپ كۇتىلۋدە.
باس جوسپاردا 164 مەكتەپ، 178 بالاباقشا جانە 93 دەنساۋلىق ساقتاۋ مەكەمەسىنىڭ قۇرىلىسى قاراستىرىلعان. 2029 جىلعا دەيىن 15 زاماناۋي وقۋشىلار سارايى سالىنادى. مۇنىڭ بارلىعى جەرگىلىكتى بيۋدجەت پەن جەكە ينۆەستيسيالار ەسەبىنەن قارجىلاندىرىلادى.
ەلوردانىڭ تۇرعىن ءۇي قورىن 68،2 ملن م2-قا دەيىن، ال جول جەلىسىنىڭ ۇزىندىعىن 1000 كم-گە 2،5 مىڭ شاقىرىمعا دەيىن ۇلعايتۋ جوسپارلانىپ وتىر. قوعامدىق كولىكتىڭ بالامالى تۇرلەرىن دامىتىپ، نەگىزگى ماگيسترالداردا، اسىرەسە ەسىل اۋدانىندا كەپتەلىستەردى جەڭىلدەتۋ ءۇشىن بەس ءىرى كوپىر سالۋ جوسپارلانعان.
سۋ تۇتىنۋ كولەمىنىڭ ءوسۋىن ەسكەرە وتىرىپ، ەرتىس-قاراعاندى كانالىنان تارتىلاتىن سۋ قۇبىرىمەن تاۋلىگىنە 210 مىڭ تەكشە مەترگە №4 سورعى-سۇزگى ستانساسى سالىنادى. بۇل رەتتە تەحنيكالىق سۋمەن قامتاماسىز ەتۋ ءۇشىن وندىرىستىك قۋاتى تاۋلىگىنە 160 مىڭ تەكشە مەترگە دەيىن جەتەتىن «تەلمان» سورعى ستانساسىن كەڭەيتۋ كوزدەلگەن.
جىلۋ جانە ەلەكتر ەنەرگياسى بويىنشا 3-جەو-نىڭ ەكىنشى كەزەگىن، ءتورت جاڭا گاز جىلۋ ستانساسىن سالۋ جانە 2-جەو-نى كەڭەيتۋ، سونداي-اق 110/10 كۆ 14 قوسالقى ستانسانى ىسكە قوسۋ جوسپارلانعان.
گازبەن جابدىقتاۋ ماسەلەلەرىن شەشۋ ءۇشىن قولدانىستاعى اگتس-1 جانە اگتس-2 اۆتوماتتاندىرىلعان گاز تاراتۋ ستانسالارىنىڭ قۋاتى ۇلعايتىلادى، سونداي-اق ۇزىندىعى 71 مىڭ شاقىرىمنان اساتىن جاڭا تارماق بويىنشا «سارىارقا» ماگيسترالدىق گاز قۇبىرىنا قوسىلاتىن اگتس-3 سالىندى.
سونىمەن قاتار وتكەن جىلى قوسىمشا 2 700 گەكتار جەر بولىنگەن استانانىڭ «جاسىل بەلدەۋىن» دامىتۋ جالعاسادى، وندا، سونداي-اق قوعامدىق جانە اۋلا اۋماقتارىن اباتتاندىرۋ شارالارى قابىلدانادى.
2025 جىلعا دەيىنگى باس جوسپاردى ىسكە اسىرۋعا بارلىق قارجى كوزدەرىنەن تارتىلعان ينۆەستيسيا كولەمى 6،3 ترلن تەڭگەنى قۇرايدى. ونىڭ 4،3 ترلن تەڭگەسى تۇرعىن ءۇي قۇرىلىسىنا جەكە ينۆەستيسيالار، 700 ملرد تەڭگەسى ينفراقۇرىلىمدىق جوبالارعا تيەسىلى.
فوتو: Advantour
