اباي وبلىسىنىڭ اكىمى بەرىك ءۋاليدىڭ توراعالىعىمەن وتكەن كەڭەيتىلگەن اپپاراتتىق كەڭەستە شالعاي ەلدى مەكەندەر مەن الاكول جاعالاۋىنداعى ينتەرنەت جەلىسىمەن قامتۋ ماسەلەسى قارالدى. سالاداعى اتقارىلعان جۇمىستار تۋرالى سيفرلىق تەحنولوگيالار باسقارماسىنىڭ باسشىسى ابزال سەرىك ۇلى باياندادى،- دەپ حابارلايدى Dalanews.kz
باسقارمانىڭ مالىمەتىنشە، وڭىردەگى 322 ەلدى مەكەننىڭ 78 پايىزىندا ينتەرنەت قولجەتىمدى. 2027 جىلعا دەيىن بۇل كورسەتكىشتى 96 پايىزعا جەتكىزۋ جوسپارلانىپ وتىر.
اباي وبلىسىنىڭ ەلدى مەكەندەرىن ساپالى ينتەرنەت جەلىسىمەن قامتاماسىز ەتۋ ماقساتىندا 2023 جىلى جول كارتاسى بەكىتىلگەن. سونىڭ شەڭبەرىندە اۋدان اكىمدىكتەرى مەن جەكە قاراجات ەسەبىنەن 23 انتەننا-دىڭگەك قۇرىلىسىن سالۋ جوسپارلانعان. ونىڭ 15ء-ىنىڭ قۇرىلىسى اياقتالعان. قالعان 8 اۋىل بويىنشا جوبالىق-سمەتالىق قۇجاتتاما دايىندالۋدا. سونىمەن قاتار، مەملەكەتتىك-جەكەمەنشىك ارىپتەستىك شەڭبەرىندە 171 ەلدى مەكەندى تالشىقتى-وپتيكالىق بايلانىسپەن قامتۋ كوزدەلگەن. سونداي-اق، ايماقتاعى ينتەرنەت جىلدامدىعى تومەن 127 مەكتەپكە Starlink سپۋتنيگى قويىلعان.
قازىرگى تاڭدا الاكول جاعالاۋىندا بارلىق بايلانىس وپەراتورلارىنىڭ 4G بازالىق ستانسيالارى ورناتىلعان. كولگە جاقىن قابانباي اۋىلىندا 1 انتەننا-دىڭگەكتى قۇرىلعى بار. جىل سوڭىنا دەيىن وسى ەلدى مەكەنگە قوسىمشا وسىنداي قۇرىلعى ورناتۋ جوسپارلانۋدا.
وبلىس اكىمى باسقارماعا وسى باعىتتاعى جۇمىستى جالعاستىرىپ، اباي اۋدانىنداعى «جيدەباي-بورىلى» مۋزەي-قورىعىن جوعارى جىلدامدىقتاعى ينتەرنەتپەن قامتاماسىز ەتۋدى تاپسىردى. ءبىرىنشى ورىنباسارى ەربول سادىرعا تالشىقتى وپتيكالىق بايلانىس جەلىسىن ورناتۋ بويىنشا جۇزەگە اسىرىلىپ جاتقان مەملەكەتتىك-جەكەمەنشىك ارىپتەستىك جوباسىنىڭ تيىمدىلىگىن انىقتاپ، قۇنىنا تالداۋ جاساۋدى مىندەتتەدى. ءبىلىم باسقارماسىنا 1 شىلدەگە دەيىن وبلىس بويىنشا ءبىلىم مەكەمەلەرىنە قاجەتتى ينتەرنەت جىلدامدىعىن انىقتاپ، جاقسارتۋ بويىنشا ۇسىنىستار ەنگىزۋدى جۇكتەدى.
«تامىز ايىندا اباي اۋدانىندا ۇلكەن ءىس-شارا وتەدى. الىس-جاقىن شەت ەلدەردەن، وزگە وڭىرلەردەن قوناقتار كەلەدى. تۋريستەر وسى تاريحي كەشەندە ينتەرنەتتىڭ باياۋلىعىنا بايلانىستى ءجيى شاعىم ايتادى. سوندىقتان شالعايداعى اۋىلدار مەن وڭىردەگى بارلىق تۋريستىك ورىنداردى ساپالى ينتەرنەت جەلىسىمەن قامتاماسىز ەتۋىمىز كەرەك»، - دەدى ايماق باسشىسى.
كەڭەيتىلگەن اپپاراتتىق كەڭەستە وبلىس اكىمى بالالاردىڭ قاۋىپسىزدىگى مەن ءورتتىڭ الدىن الۋعا ارنايى توقتالدى. قالا، اۋدان اكىمدەرى مەن جاۋاپتى باسقارمالارعا كامەلەتكە تولماعان بالالاردىڭ قاۋىپسىزدىگىن قامتاماسىز ەتۋ، اتا-انالارمەن ءتۇسىندىرۋ جۇمىستارىن جۇرگىزۋ، جازعى ماۋسىمدا ءورتتىڭ الدىن الۋ شارالارىن كۇشەيتۋگە قاتىستى ناقتى تاپسىرمالار بەردى. سونىمەن قاتار، كوپقاباتتى تۇرعىن ۇيلەردە تەرەزەدەن قۇلاۋ جاعدايلارىن بولدىرماۋ ءۇشىن ارنايى قۇرىلعىلاردى ورناتۋ بويىنشا تۇرعىندارمەن جۇمىس جۇرگىزۋ قاجەتتىگىن ايتتى.
