2026 جىل سيفرلاندىرۋ جانە جاساندى ينتەللەكت جىلى بولىپ جاريالاندى، دەپ حابارلايدى Dalanews.kz.
بۇل تۋرالى مەملەكەت باسشىسى قاسىم-جومارت توقايەۆ مالىمدەدى.
"2026 جىلى قازاقستان جاڭعىرۋدىڭ جاڭا كەزەڭىنە قادام باسادى. ەلىمىزدىڭ جارقىن كەلەشەگى ءۇشىن الداعى كونستيتۋسيالىق رەفورمانىڭ ءمان-ماڭىزى زور. ازاماتتارىمىز قازاقستاننىڭ وسىپ-وركەندەۋىنە تىڭ سەرپىن بەرەتىن بۇل رەفورمانى قولدايدى دەپ سەنەمىن. ءبىز ەنەرگەتيكالىق الەۋەتىمىزدى نىعايتىپ، اگروونەركاسىپ كەشەنى، سۋ شارۋاشىلىعى ماسەلەلەرىن شەشىپ، كولىك-لوگيستيكا سالاسىن جانە تۇرعىن ۇي-كوممۋنالدىق شارۋاشىلىعىنىڭ ينفراقۇرىلىمىن دامىتا بەرەمىز. شاعىن جانە ورتا بيزنەس ءاردايىم مەملەكەتتىڭ نازارىندا بولادى. بارلىق وڭىردە جاڭا كاسىپورىندار اشىلىپ، جولدار جوندەلەدى، سونداي-اق تۇرعىن ۇيلەر، مەكتەپتەر، دەنساۋلىق ساقتاۋ، سپورت جانە مادەنيەت نىساندارى بوي كوتەرەدى.
مەن بيىلعى جولداۋىمدا سيفرلىق مەملەكەت بولۋىمىز كەرەكتىگىن جاريالادىم. سوندىقتان كەلەسى جىلدى سيفرلاندىرۋ جانە جاساندى ينتەللەكت جىلى دەپ اتاۋ تۋرالى شەشىم قابىلدادىم. وزىق تەحنولوگيالار ەلىمىزدىڭ بارلىق سالاداعى الەۋەتىن ارتتىرۋعا جول اشپاق"، - دەدى پرەزيدەنت.
