شىمكەنتتىك "ورداباسى" جانە قازاقستان ۇلتتىق قۇراماسىنىڭ كاپيتانى اسحات تاعىبەرگەن باسقا كلۋبقا اۋىسۋى مۇمكىن، – دەپ حابارلايدى Dalanews.kz.

قازاقستان فۋتبول فەدەراسياسى پرەزيدەنتىنىڭ كەڭەسشىسى نۇرسۇلتان قۇرمان فۋتبولشىمەن سويلەسكەنىن، اسحات تاعىبەرگەن بۇل اقپاراتتى راستاعانىن ايتتى.

"اسحات تاعىبەرگەن "ورداباسىدان" كەتكەنىن راستادى. كەلىسىمشارتتىڭ اياقتالۋىنا 10 اي قالعان ەدى. تولىق كومپەنساسياسىن دا تالاپ ەتپەپتى. ەڭ از نۇسقاسىن تاڭداعان. ازىرگە جاڭا كلۋبقا اۋىسپاعان. جاقىن كۇندەرى اقپارات بولىپ قالار…" - دەپ جازدى ول.

ەسكە سالايىق، بۇعان دەيىن شىمكەنت اكىمى عابيت سىزدىقبەكوۆ "ورداباسىنىڭ" قارجىلىق پروبلەمالارى تۋرالى ايتا كەلە، اسحات تاعىبەرگەن 20 ملن تەڭگە جالاقى الىپ وتىرعانىن، سوعان قاراماستان جوعارى دەڭگەيدە فۋتبول ويناي المايتىنىن مالىمدەگەن ەدى.

"سەرىي CARDINAL" ارناسىنىڭ مالىمەتىنشە، تاعىبەرگەنگە "تۇران" مەن "قايسار" كلۋبتارى كوز تىگىپ وتىر.

سونداي-اق، الەۋمەتتىك جەلىدە "توبىل" تاراپىنان دا قىزىعۋشىلىق بولعانى تۋرالى اقپارات تارادى.