17 جىل بويى اعا-جەڭگەسٸنٸڭ مالىن باعىپ, قۇلدىقتا بولعان قۇندىز بەن نازگٷلگە قاتىستى جاڭا اقپارات تارادى. ەلەۋمەتتٸك جەلٸدە قۇندىزدىڭ اياق-قولى سكوتچپەن بايلاۋلى جاتقان سۋرەتٸ تارادى. جۋرناليست رۋسلان ٶتەپباي مەسەلەنٸڭ مەن-جايىن انىقتاپ كەلگەن, دەپ حابارلايدى Dalanews.kz.
جۋرناليست قىزداردىڭ زاڭدى قامقورشىسى زٷلفييا تٶلەنوۆانىڭ ٷيٸنە بارعان. قۇندىز بەن نازگٷل قازٸرگٸ ۋاقىتتا سول ەيەل ادامنىڭ قامقورلىعىندا. قىزدار زٷلفييا تٶلەنوۆانى "ماما" دەپ اتايدى.
قۇندىزدىڭ سٶزٸنشە, ونى زٷلفييا تٶلەنوۆا بايلاپ قويعان.
"ماما ٸستەدٸ. زٷلفييا ماما. كٶپ ۋاقىت جاتتىم وسىلاي. مەنٸ بايلاعان كەزدە زٷلفييا ماما ٷيدە بولدى", - دەيدٸ قۇندىز.
ال زٷلفييا تٶلەنوۆا بۇل ۋاقىتتا ٷيدە بولماعانىن ايتادى.
"مەن ونى بايلاعان كەزدە ٷيدە بولعان جوقپىن. بايلانعانىن كٶرگەن جوقپىن. تٷسٸنبەيمٸن", - دەيدٸ زٷلفييا تٶلەنوۆا.
رۋسلان ٶتەپبايدىڭ سٶزٸنشە,قينالىپ جٷرگەن تەك قۇندىز بەن نازگٷل عانا ەمەس ەكەن. بىلتىر 29 جەلتوقساندا زاڭدى قامقورشى زٷلفييا تٶلەنوۆانىڭ ٷستٸنەن ۇرىپ-سوعۋ فاكتٸسٸ بويىنشا قىلمىستىق ٸس قوزعالعان. ارىزدانۋشىلار - تٶلەنوۆا اسىراپ العان باسقا بالالار.
"بالالاردىڭ ايتۋىنشا, زٷلفييا تٶلەنوۆا ٸشٸمدٸك ٸشٸپ الىپ, ولاردىڭ مازاسىن الىپ, بٸرنەشە رەت قول كٶتەرگەن. اتالعان دەرەك بويىنشا قازٸرگٸ تاڭدا تەرگەۋ امالدارى جٷرگٸزٸلٸپ جاتىر. ەگەر كٸنەسٸ دەلەلدەنسە, زاڭ اياسىندا جاۋاپقا تارتىلادى", - دەيدٸ جۋرناليست.
