تاللين قالاسىندا 14 جىل بويى جاسىرىنىپ جۇرگەن قاراقشىلىققا كۇدىكتى قازاقستان ازاماتى ۇستالدى، دەپ حابارلايدى Dala News.

پاۆلودار وبلىستىق پوليسيا دەپارتامەنتىنىڭ مالىمەتىنشە، وڭىردە وتكەن «روزىسك» جەدەل الدىن الۋ ءىس-شاراسى بارىسىندا بارلىعى 16 قىلمىسكەر انىقتالعان. ولاردىڭ ىشىندە 9-ى تمد ەلدەرىندە قىلمىس جاساپ، حالىقارالىق ىزدەۋدە جۇرگەن شەتەل ازاماتتارى.

پوليسيانىڭ حابارلاۋىنشا، ەڭ رەزونانستى جاعدايلاردىڭ ءبىرى 2012 جىلى جاسالعان قاراقشىلىق قىلمىسقا قاتىستى بولدى. كۇدىكتى سول كەزدەن بەرى قۇقىق قورعاۋ ورگاندارىنان جاسىرىنىپ، ەستونيا اۋماعىندا ءومىر سۇرگەن.

تەرگەۋ دەرەكتەرىنە سايكەس، ول ءوزىن اشكەرەلەمەۋ ءۇشىن جالعان قۇجاتتاردى پايدالانىپ، بوتەن ادامنىڭ اتىمەن ءومىر سۇرگەن. وسىلايشا ۇزاق ۋاقىت بويى قۇقىق قورعاۋ ورگاندارىنىڭ نازارىنان تىس قالىپ كەلگەن.

الايدا پاۆلودارلىق جەدەل قىزمەتكەرلەر ينتەرپولمەن بىرلەسىپ جۇرگىزگەن جۇمىستار ناتيجەسىندە ونىڭ ناقتى ورنالاسقان جەرى انىقتالىپ، تاللين قالاسىندا ۇستالدى.

قازىرگى ۋاقىتتا كۇدىكتىنى قازاقستانعا ەكستراديسيالاۋ ماسەلەسى حالىقارالىق كەلىسىمدەر اياسىندا قاراستىرىلىپ جاتىر.

سونىمەن قاتار اتالعان ءىس-شارا بارىسىندا پاۆلودار وبلىسىنىڭ ششەرباقتى اۋدانىندا مەملەكەتتىك شەكارانى زاڭسىز كەسىپ وتپەك بولعان قىرعىزستان ازاماتى دا ۇستالعان. ول رەسەي فەدەراسياسىندا جاسالعان ۇرلىق قىلمىسى بويىنشا ىزدەۋدە بولعان.

پوليسيا مالىمەتىنشە، جىل باسىنان بەرى پاۆلودارلىق جەدەل قىزمەتكەرلەر حالىقارالىق ىزدەۋدە جۇرگەن 47 ادامدى انىقتاپ، ۇستاعان.