بەلارۋس پرەزيدەنتتىگىنەن ۇمىتكەر بولعان سۆەتلانا تيحانوۆسكايا الەكساندر لۋكاشەنكوعا قارسى اكسياعا قاتىسۋشىلار جاڭا ۋلتيماتۋم قويعانىن مالىمدەدى، دەپ جازادى centralasian.org.
ونىڭ ايتۋىنشا، 25 قازانعا دەيىن لۋكاشەنكو قىزمەتىنەن كەتۋى ءتيىس.
تيحانوۆسكايا تەلەگرام-كانالىندا لۋكاشەنكو اتالعان كۇنگە دەيىن كەتۋى ءتيىس، ونىڭ وپپونەنتتەرى پرەزيدەنت رەتىندە مويىندامايدى دەپ مالىمدەدى. بۇدان بولەك تاعى ەكى تالاپ قويىلعان – قارسىلىق اكسياسىنا قاتىسۋشىلارعا زورلىق-زومبىلىق كورسەتۋدى توقتاتۋ جانە ساياسي تۇتقىنداردىڭ ءبارىن بوستاندىققا شىعارۋ.
ەگەر تالاپتار ورىندالماسا، 26 قازاننان باستاپ بارلىق كاسىپورىنداردىڭ ۇلتتىق نارازىلىعى باستالادى، بارلىق جولدار جابىلادى، مەملەكەتتىك دۇكەندەردەگى ساتىلىم قۇلدىرايدى دەپ ەسكەرتەدى تيحانوۆسكايا.
"ءۇش تالاپتى ورىنداۋعا 13 كۇن ۋاقىت بار. بىزدە دە بارىنە دايىندالۋعا 13 كۇن ۋاقىت بار"، – دەپ جازادى تيحانوۆسكايا. ول بيلىكتىڭ ديالوگ جۇرگىزىپ جاتىرمىز دەگەن پىكىرىن تەرىسكە شىعارىپ، ولاردىڭ ارەكەتىن "مەملەكەتتىك تەررور" دەپ اتادى.
ول قۇقىق قورعاۋ ورگاندارىنىڭ وكىلدەرىن حالىق جاعىنا شىعۋعا شاقىردى.
بەلارۋستا 9 تامىزدا وتكەن پرەزيدەنت سايلاۋىنان كەيىن ساياسي داعدارىس تەرەڭدەپ بارادى. ەلدى 1994 جىلدان بەرى باسقارىپ كەلە جاتقان الەكساندر لۋكاشەنكو سوڭعى سايلاۋدا جەڭىسكە جەتكەنىن جاريالاعانىمەن، بەلارۋس وپپوزيسياسى ونى مويىنداۋدان باس تارتتى.
سايلاۋدا لۋكاشەنكونىڭ باستى قارسىلاسى بولعان 37 جاستاعى سۆەتلانا تيحانوۆسكايا سايلاۋدان كەيىن ەلدەن قاشىپ كەتۋگە ءماجبۇر بولدى. ءقازىر ليتۆادا تۇرىپ جاتقان ول حالىقارالىق قاۋىمداستىقتى سايلاۋ ناتيجەسىن مويىنداۋدان باس تارتۋعا شاقىرىپ كەلەدى. ەۋروپارلامەنت الەكساندر لۋكاشەنكونى بەلارۋستىڭ پرەزيدەنتى رەتىندە مويىندامايتىنىن جاريالادى.
29 قىركۇيەكتە فرانسيا پرەزيدەنتى ەممانۋەل ماكرون ليتۆادا تيحانوۆسكايامەن كەزدەسىپ، بەلارۋستاعى ساياسي داعدارىستى رەتتەۋگە قولىنان كەلگەنشە كومەكتەسەتىنىن ءبىلدىردى.
