Belarýs prezidenttiginen úmitker bolǵan Svetlana Tihanovskaia Aleksandr Lýkashenkoǵa qarsy aktsiiaǵa qatysýshylar jańa ýltimatým qoiǵanyn málimdedi, dep jazady centralasian.org.
Onyń aitýynsha, 25 qazanǵa deiin Lýkashenko qyzmetinen ketýi tiis.
Tihanovskaia telegram-kanalynda Lýkashenko atalǵan kúnge deiin ketýi tiis, onyń opponentteri prezident retinde moiyndamaidy dep málimdedi. Budan bólek taǵy eki talap qoiylǵan – qarsylyq aktsiiasyna qatysýshylarǵa zorlyq-zombylyq kórsetýdi toqtatý jáne saiasi tutqyndardyń bárin bostandyqqa shyǵarý.
Eger talaptar oryndalmasa, 26 qazannan bastap barlyq kásiporyndardyń ulttyq narazylyǵy bastalady, barlyq joldar jabylady, memlekettik dúkenderdegi satylym quldyraidy dep eskertedi Tihanovskaia.
"Úsh talapty oryndaýǵa 13 kún ýaqyt bar. Bizde de bárine daiyndalýǵa 13 kún ýaqyt bar", – dep jazady Tihanovskaia. Ol biliktiń dialog júrgizip jatyrmyz degen pikirin teriske shyǵaryp, olardyń áreketin "memlekettik terror" dep atady.
Ol quqyq qorǵaý organdarynyń ókilderin halyq jaǵyna shyǵýǵa shaqyrdy.
Belarýsta 9 tamyzda ótken prezident sailaýynan keiin saiasi daǵdarys tereńdep barady. Eldi 1994 jyldan beri basqaryp kele jatqan Aleksandr Lýkashenko sońǵy sailaýda jeńiske jetkenin jariialaǵanymen, belarýs oppozitsiiasy ony moiyndaýdan bas tartty.
Sailaýda Lýkashenkonyń basty qarsylasy bolǵan 37 jastaǵy Svetlana Tihanovskaia sailaýdan keiin elden qashyp ketýge májbúr boldy. Qazir Litvada turyp jatqan ol halyqaralyq qaýymdastyqty sailaý nátijesin moiyndaýdan bas tartýǵa shaqyryp keledi. Eýroparlament Aleksandr Lýkashenkony Belarýstyń prezidenti retinde moiyndamaitynyn jariialady.
29 qyrkúiekte Frantsiia prezidenti Emmanýel Makron Litvada Tihanovskaiamen kezdesip, Belarýstaǵy saiasi daǵdarysty retteýge qolynan kelgenshe kómektesetinin bildirdi.
