شەتەلدىك ازامات قازاقستاندا سان سوعىپ قالدى، - دەپ حابارلايدى Dalanews.kz
ءىىم مالىمەتىنشە، اقمولا وبلىسىندا بولگاريا ازاماتىن 102 ميلليون تەڭگەگە الداعان قىلمىستىق توپتىڭ مۇشەلەرى ۇستالعان.
شەتەلدىك ازامات مامىر-ماۋسىم ايلارىندا ينتەرنەت الاياقتاردىڭ قۇربانىنا اينالعان. قاسكويلەر وزدەرىن بانك قىزمەتكەرلەرى رەتىندە تانىستىرىپ، جابىرلەنۋشىنى ءىرى كولەمدەگى اقشانى بوگدە ادامداردىڭ شوتىنا اۋدارۋعا كوندىرگەن.
تۇسكەن ارىز بويىنشا پوليسەيلەر قىلمىستىق ءىس قوزعاپ، جەدەل ىزدەستىرۋ شارالارىن جۇرگىزگەن. ناتيجەسىندە قىلمىستىڭ ەكى ۇيىمداستىرۋشىسى انىقتالدى.
"ولار - پاۆلودار وبلىسىنىڭ تۇرعىندارى. قىلمىستىق سحەمانىڭ تاعى ءتورت قاتىسۋشىسى بەلگىلى بولدى. الدىن الا مالىمەت بويىنشا كۇدىكتىلەردىڭ كوكشەتاۋ قالاسى مەن قورعالجىن اۋدانىنداعى وسىنداي جايتتارعا قاتىسى بولۋى مۇمكىن. ءتىنتۋ بارىسىندا ۇيالى تەلەفوندار، قاراجاتتىڭ ءبىر بولىگى تاركىلەندى. بارلىق كۇدىكتى ۋاقىتشا ۇستاۋ يزولياتورىنا قامالدى"، - دەدى پوليسيا.
