پولشانىڭ كاتوۆيسە قالاسىندا اشىلعان قۇشاقتاسۋ سالونى بۇگىندەرى كەڭىنەن تانىمالدىققا يە. ول، نەگىزىنەن، جالعىزباستى ادامدارعا ارنالعان. ەكى جىل بۇرىن اشىلعان مەكەمە، باستاپقىدا ءوز قىزمەتىنىڭ مۇنشالىقتى سۇرانىسقا يە بولاتىنىن كۇتپەپتى، دەپ جازادى Dalanews.kz.
كوبىنەسە مەكەمەنىڭ كليەنتتەرى 40 پەن 60 جاس ارالىعىنداعى ادامدار. سالوندا كەزدەسكەن ولار قۇشاقتاسىپ، بىر-بىرىنەن پسيحولوگيالىق قولداۋ الادى ەكەن. قىزمەت قۇنى - 1 ساعاتىنا – 37 دوللار.
"ورتالىقتىڭ نەگىزىن قالاۋشى، كوۋچ الەكساندرا كاسپەرەك جالعىزدىقپەن، جان جاراسىمەن كۇرەسۋگە كومەكتەسىپ، دارىستەر وتكىزەدى"، دەپ جازادى Daily Mail.
سالونعا كەلگەن ادام، ەڭ ءبىرىنشى كەزەكتە، ساۋالناماعا قاتىسىپ، ودان كەيىن دۋش قابىلداپ، ۇستىنە تەك حالات كيەدى. ءبىراق سەكسۋالدى ارەكەتكە بۇل ارادا جول جوق. ەگەر وسى سيپاتتاعى بەلگىلەر بايقالسا، ول ادامدار سالوننان بىردەن قۋىلادى ەكەن.
ايتا كەتسەك، 14 ناۋرىزدا ەلىمىزدە ناۋرىز مەيرامىنىڭ باسى كورىسۋ كۇنى دەگەن بار. بۇل كۇندى امال مەرەكەسى دەپ تە ايتادى. حالىق قىستان امان-ەسەن شىققانىنا، كوكتەمگە اياق باسىپ، تۋىس-تۋعان، كورشى-كولەڭمەن جۇزدەسكەنىنە قۋانىپ، قول الىسىپ، ءتوس قاعىسادى، قۇشاقتاسىپ، قاۋىشادى. وسىلايشا ارازدىق، وكپە-رەنىشتى ۇمىتىپ، بىر-بىرىنە اماندىق تىلەيدى.
