Жамбыл облысында сот оқушылар арасындағы қайғылы оқиға туралы іс бойынша үкім шығарды, деп хабарлайды Dalanews.kz.

Сот мәліметінше, кәмелетке толмаған сотталушы Р. - 9-сынып оқушысы.

"Ол Тараз қаласындағы мектепте кәмелетке толмаған құрдасы А.-мен қақтығыс кезінде оған физикалық зорлық-зомбылық көрсеткен. Мойын жарақатының салдарынан жәбірленуші оқиға орнында қайтыс болды", - деп жазылған сот мәліметінде.

Сотталушының кінәсі куәлердің айғақтарымен, сараптама қорытындыларымен және заттай дәлелдермен дәлелденген.

Прокурор сотталушыға 6 жыл 8 айға бас бостандығынан айыру жазасын тағайындауды сұрады.

Сот үкімімен сотталушы Р. ҚК 106-бабының 3-бөлігі бойынша кінәлі деп танылып, оған ҚК 81-бабының 7-бөлігі және ҚК 55-бабы 2-бөлігінің 2) тармағы негізінде 6 жыл 8 ай мерзімге бас бостандығынан айыру жазасы тағайындалды. Сондай-ақ, сот сотталушының заңды өкілдерінен жәбірленуші тараптың пайдасына 10 млн теңге мөлшерінде моральдық зиян өндіріп алды.

Үкім заңды күшіне енген жоқ.