Qazaq Вanki-нің бұрынғы акционері Бақыт Ибрагим бостандыққа шықты. Бұл туралы Қылмыстық атқару жүйесі комитетіндегілер "Власть" басылымына берген жауабында айтқан, - деп хабарлайды Dalanews.kz.
Ибрагим 2020 жылы ақша жымқырғаны үшін сотталған болатын. Осы іс бойынша тағы бір айыпталушы банкир Жомарт Ертаев әлі жазасын өтеп жатыр.
4 жыл бұрын Ибрагим, Ертаев және тағы бір топ адам Bank RBK-ден 144 миллиард теңге жымқырды деп айыпталған болатын. Бастапқыда Бақыт Ибрагим 8 жылға сотталған болатын. Кейіннен апелляциялық инстанцияда бұл мерзім 7 жылға қысқарды.
Ал Жомарт Ертаев Bank RBK ісі бойынша бастапқыда 11 жылға сотталып, кейіннен оның да жазасын өтеу мерзімі 9 жылға қысқарды.
Бақыт Ибрагим 2018 жылы Германияда ұсталып, Қазақстанға экстрадицияланған. Сол жылы Жомарт Ертаев Мәскеуде ұсталып, елге экстрадицияланды.
