Желтоқсан айында Қазақстанда тұрғын үйді сатып алу-сату бойынша соңғы үш жылдағы ең жоғары көрсеткіш тіркелді, деп хабарлайды Dalanews.kz.
Ресми статистикаға сәйкес, 2025 жылдың желтоқсанында ел бойынша 53 128 мәміле жасалған. Бұл бір айдағы көрсеткіштің 32,9 пайызға өскенін білдіреді.
Қараша айымен салыстырғанда барлық өңірде өсім байқалды. Ең жоғары динамика Маңғыстау облысында (+69,2%), Павлодар облысында (+66,3%) және Ақтөбе облысында (+53,6%) тіркелді.
Мәміле саны бойынша көшбасшылар – Астана (11 674 мәміле немесе 22%), Алматы (9 013 немесе 17%) және Қарағанды облысы (3 804 немесе 7,2%). Ең төмен көрсеткіш Ұлытау облысында – 427 мәміле (0,8%).
Пәтерлер нарығында келісімдер саны 31,9 пайызға өсіп, 41 177-ге жетті. Бұл барлық мәміленің 77,5 пайызы. Негізгі үлес Астанаға (28%), Алматыға (20%) және Қарағанды облысына (7,8%) тиесілі. Ең көп сұранысқа ие тұрғын үй түрі – бір бөлмелі пәтерлер: желтоқсанда 15 323 мәміле рәсімделген.
Жеке үйлер бойынша мәмілелер саны 36,6 пайызға артып, 11 951-ге жетті. Барлық өңірде өсім байқалды, тек Павлодар облысында көрсеткіш 10,4 пайызға төмендеген. Ең жоғары өсім Маңғыстау (+83,9%), Ақтөбе (+76,6%) және Батыс Қазақстан (+52,8%) облыстарында тіркелді.
Жылдық есепте желтоқсандағы мәмілелер саны 2024 жылдың осы кезеңімен салыстырғанда 6,2 пайызға артқан. Ең жоғары өсім Жетісу облысында (+35,8%), ал ең үлкен төмендеу Ұлытау облысында (–33,8%) байқалды.
Жалпы 2025 жылы ел бойынша 448 571 тұрғын үй мәмілесі жасалды. Бұл 2024 жылмен салыстырғанда 3,6 пайызға көп. Ең жоғары өсім Астанада (+21,6%), Жамбыл облысында (+10,1%) және Жетісу облысында (+10,1%) тіркелсе, ең үлкен құлдырау Атырау облысында (–13,2%), Ұлытау (–12,5%) және Батыс Қазақстан облыстарында (–12,3%) байқалды.
