Қазақстанда онлайн-казино қызметіне тыйым салынған. Алайда көлеңкелі платформалар бұл тыйымды елемейді – заңсыз бизнес өкілдері заң шеңберінде әрекет етуге дағдыланбаған.
Олардың қызметін пайдаланатын азаматтар автоматты түрде екі есе тәуекелге тап болады: біріншіден, қаржылық шығынға ұшырау, екіншіден, бір сәтте жеке деректерінен айырылып қалу қаупі бар.
Соған қарамастан, қазақстандықтар күмәнді цифрлық алаңдарда ойнауды жалғастыруда. Қаржылық мониторинг агенттігінің мәліметінше, тек «1WIN» ресурсында мыңдаған қазақстандық азаматтар тіркелген. Бұл ұйым Қазақстанда ғана емес, шекарадан тыс жерде де заңсыз жұмыс істеген, сонымен қатар заңсыз букмекерлік қызметтер ұсынған.
«1WIN» ұйымдастырушыларына тек пайда табу ғана маңызды болғандықтан, олар ставкаларды интернет-эквайринг арқылы қабылдап, кәмелет жасына толмағандарды құмар ойындарға тартқан. Нәтижесінде көлеңкелі айналым 3,8 миллиард теңгеге жеткен.
«Қазіргі уақытта «1WIN» бойынша тергеу жүргізілуде. Онлайн-казиноның интернет-ресурсы бұғатталып, оның төрт құрылтайшысы – РФ азаматы Сергей Черных, Украина азаматшасы Марина Юдина және Қазақстан азаматтары Павел Нестеренко мен Тұрсын Мусалиева халықаралық іздеуге жарияланды», – деп хабарлайды Қаржылық мониторинг агенттігі.
Сонымен қатар, бұл тұлғалар заңсыз ойын бизнесін ұйымдастырумен қатар, адамдарды еркіндігінен айыру және оларға күш көрсету әрекеттерінде де күдікке ілінген.
Ведомство сонымен бірге олардың жалпы сомасы 1,5 миллиард теңге болатын мүлкі мен ақшалай қаражатына тыйым салынғанын мәлімдеді. Бұған қоса, «Mercedes-Maybach S500» және «Lamborghini Huracan» автокөліктері тәркіленген.
Дегенмен, заңсыз әрекеттер тоқтатылғанына қарамастан, «1WIN» клиенттерінің алдында жаңа проблемалар туындады. Онлайн-казино сайты бұзылып, exploit.in форумында оның келушілерінің мәліметтері – аты-жөндері, телефон нөмірлері, жеке телеграм-каналдары мен құпиясөздері, сондай-ақ әзірлеушілердің жеке деректері мен казино жұмысының алгоритмдері пайда болды.
Сондықтан бүгінде телефон мен интернет алаяқтар телефон нөмірін, туған күнін және есімін білетініне таңғалудың қажеті жоқ. Бұл тұста дамыған елдердің тәжірибесіне сүйеніп, кәмелетке толмағандар мен несие бойынша қарызы бар адамдардың ойнауын шектеу және "жауапты ойын" қағидатын енгізу маңызды.
