Ақтауда күзгі шақырылым бойынша әскерге аттанатын сарбаздарды шығарып салу рәсімі өтті, деп хабарлайды Dalanews.kz Otpannews.kz-ке сілтеме жасап.

Салтанатты шарада 25 жас сарбазды туған-туыстары қимастықпен шығарып салды. Сонымен қатар, қала әкімі Әбілқайыр Байпақов пен Мәжіліс депутаты Наталья Дементьева өз тілектерін білдіріп, сарбаздарға сәт-сапар тіледі.

“Отан алдындағы борышты өтеу – әр азаматтың қасиетті міндеті. Әскерге алынған сарбаздарға ақ жол тілейміз. Ата-анаңыздың үмітін ақтап, елге аман-есен оралуыңызды тілейміз,” – деді Әбілқайыр Байпақов.

Ақтаудан әскерге шақырылғандардың бірі – Алихан Гасанов. Оның анасының айтуынша, әр азамат үшін Отан алдындағы борышты өтеу – маңызды міндет.

“Кез келген елдің тәуелсіздігі мен егемендігін қорғайтын – мемлекет әскері. Әскердің арқасында ел шекарасы тыныш. Бүгін мен үшін ерекше күн, жалғыз ұлымды әскерге аттандырып отырмын. Бұл – мен үшін үлкен шешім,” – деп бөлісті ата-аналар атынан сөз алған Мәжіліс депутаты Наталья Дементьева.