Талдықорған полициясының бұрынғы басшысы Марат Күштібаевтың артынан тағы үш адам темір торға тоғытылып отыр, - деп хабарлайды Dalanews.kz "КТК" телеарнасына сілтеп.

Мән-жай

Олар - экс-полицейден «жәбір көрдім» деген әйел мен оның танысы және Талдықорған сотының хатшысы. Тергеуде Күштібаевтың зайыбы мен ағасына хатшыдан жазаны жеңілдетуге болады деген ұсыныс түскен көрінеді.

"Өйткені жәбірленуші сотта өз айғақтарын өзгертуі үшін хатшы қыз арқылы 50 млн теңге талап етіпті. Сөйтіп қаржының қомақты бөлігі қызға берілгенімен, айғақтар өзгертілмеген. Марат Күштібаев 11 жылға сотталады. Әйелі берілген ақшаны қайтаруды сұрап, кейін алаяқтық фактісі бойынша полицияға арыз жазған", - деп жазылған мәліметте.

Осылайша Көксу аудандық судьясы былықтың бетін ашып, үшеуін де 6 жылға бас бостандығынан айырды.

"Сот жеңілдететін және ауырлататын мән-жайды ескере отырып, А., С. және К.-ні ҚР ҚК 190-бабы, 4-бөлігі, 2-тармағы бойынша кінәлі деп танып, әрқайсына 6 жыл бас бостандығынан айыру жазасын тағайындады. Сот үкімі заңды күшіне енген жоқ", - деп жазылған Жетісу облысы Көксу ауданының соты мәліметінде.

Күштібаевқа қатысты іс

2023 жылғы қарашада Талдықорған полициясының бұрынғы бастығы Марат Күштібаев 27 жастағы әйелді зорлады деген күдікпен ұсталды. Кейінірек жәбірленушінің адвокаты оқиғаның егжей-тегжейін айтты. Оның сөзінше, 2023 жылғы 12 қарашада ішкі істер басқармасына қоғамдық тәртіпті бұзды деген айыппен Талдықорған тұрғыны жеткізіліп, кейін ол бастықтың қызметтік кабинетінде зорлық көрген.

Кейін сот үкімі бойынша Күштібаев кінәлі деп танылып, Қылмыстық кодекстің 120-бабы 2-бөлігінің 5-тармағы бойынша 11 жылға бас бостандығынан айырылды. Сондай-ақ, ол марапаттарынан және "полиция полковнигі" арнайы атағынан айырылды.