Соңғы үш жылда Жетісу облысындағы Кербұлақ ауданында 260 тұрғын баспанаға ие болса, биыл тағы 368 үй беріледі. Солардың ішінде апатты үйлердің тұрғындары да бар. Осы шаралардың нәтижесінде жыл соңына қарай тұрғын үй кезегі 28%-ға қысқарады деп күтілуде. Бұл туралы аудан тұрғындарымен кездесу барысында айтылды,- деп хабарлайды Dalanews.kz Жетісу облысы әкімінің баспасөз қызметіне сілтеме жасап.
- Биыл жыл соңында пайдалануға берілетін 60 пәтерлік екі бес қабатты тұрғын үйдің бірі несиелік үй ретінде, екіншісі апатты жағдайдағы тұрғын үйлерде тұратын азаматтарды көшіру мақсатында салынып отыр. Сонымен қатар осы жылы әлеуметтік жағынан аз қамтылған отбасыларға табыстау үшін жыл аяғына дейін 188 тұрғын үй сатып аламыз. Бұдан бөлек кезекте тұрған осы санаттағы отбасыларға арнап 60 пәтерлі тұрғын үй салынып жатыр, қазан айында табысталады, - деген облыс әкімінің бірінші орынбасары Әлібек Жақанбаев тұрғын үй беру функциясы жергілікті артқарушы органнан "Отбасы банкке" берілгенін атап өтті.
Баяндамасын жалғастырған ол аудандағы инфрақұрылымды дамыту мәселелеріне тоқталды. Бұл ретте Сарыөзек ауылындағы ауыз су проблемасы жылдар бойы өзекті болып келген. Қазір ауыз су жүйесін жаңғыртудың 5-ші кезеңі жүріп жатыр. Бүгінгі күні 98 шақырым суқұбыры жүйесінің 50 шақырымы ауыстырылып, 98 құдық орнатылды. Жоба аяқталғанда ауыз су мәселесі толық шешіледі. Өткен жылы Қарымсақ, Шаған, Қарашоқы ауылдарындағы су жүйесі қайта жаңғыртылып, елді мекен тұрғындары таза ауыз суға қол жеткізді. Ал биыл Ақбастау, Тастыөзек ауылдарында да осындай жұмыстар жүргізілуде, жоба келесі жылы аяқталады.
Ауданның әлеуметтік инфрақұрылымын дамытуға да көп көңіл бөлінеді. Білім беру саласында биыл Қоғалы, Жаңалық ауылдарының мектептеріне ағымдағы жөндеу жұмыстары жүргізіліп, Көксай ауылында 60 орындық мектеп салынуда. Шанханай, Қарағаш және Сарыөзек ауылдарына оқушылар тасымалдау үшін 3 автобус берілді.
Денсаулық сақтау саласында былтыр Сарыөзек ауылында 250 адам қабылдайтын емхана қолданысқа беріліп, Онжас, Көксай, Рудник-Арқарлы, Жоламан, Қазансу, Қарлығаш, Тастыбастау, Қызылмектеп ауылдарында медициналық пункттер орнатылса, жыл соңына дейін Көктал ауылында медпункт, Сарыөзек ауылында Жедел жәрдем станциясы ашылады. «Ауылдағы денсаулық сақтауды жаңғырту» ұлттық жобасы аясында ауданда 17 нысан салынуда, атап айтқанда, 9 дәрігерлік амбулатория, 6 фельдшерлік-акушерлік және 2 медициналық пункт жыл соңына дейін пайдалануға беріледі, ал «Ауыл – Ел бесігі» бағдарламасы аясында Көксу, Шанханай, Талдыбұлақ ауылдарында дәрігерлік амбулаториялар бой көтеруде. Құрылыс жұмыстары жыл соңына дейін аяқталады. Соның нәтижесінде соңғы екі жылда ауданның 63 елді мекенінің 30-ында денсаулық сақтау инфрақұрылымы жаңартылады. Тағы да бір айта кетерлігі, аудандық аурухананы қайта жаңғыртуға арнайы мемлекеттік қордан қаржы бөлінді, жұмыстарын келесі жылы аяқтау жоспарланған.
Мәдениет саласына келсек, былтыр Шұбар, Қоянкөз ауылдарында блокты-модульді клуб орнатылып, Қоғалы ауылының мәдениет үйі күрделі жөндеуден өтті. Ал биыл Сарыөзек ауылында кітапхананың құрылысы жүргізілуде, келесі жылы іске қосылады.
Жалпы есептік кездесу барысында аудан халқының тұрмыс сапасын жақсарту бағытында қабылданып жатқан шараларға және әлеуметтік-экономикалық дамудың негізгі бағыттарына баса назар аударылды.
Кездесу барысында ауыл тұрғындары өздерін толғандырған сұрақтарын қойып, ұсыныс-тілектерін жеткізді.
Басши округінің тұрғындарын көше жарығы мәселесі алаңдатады. Жиында аталған округке қарайтын Басши, Нұрым, Ақтөбе ауылдарында бұл мәселені шешу үшін жобалық-сметалық құжаттама әзірленгені айтылды.
Қарымсақ ауылының тұрғыны ауылдың басты көшелерінде асфальттың жоқтығына шағымданды. Осындай мәселе Талдыбұлақ ауылдық округінен келген Болат Асанов тарапынан да көтерілді. Бұл ретте жолдарды жөндеу жұмыстары кезең-кезеңімен жүзеге асырылатыны хабарланды.
Сонымен қатар Бостан ауылындағы Шаяхметов көшесінің жөндеу жұмыстарын келесі аптада бастау жоспарланған. Және де Қарашоқы ауылына апаратын кіреберіс жолдың жөндеуін қазан айына дейін аяқтау тапсырылды.
Сарыбұлақ ауылы маңындағы 2-ші ферма тұрғыны Абдул Кончиев ауыз су және байланыс мәселелерін көтерді. Аталған аумақ фазенда саналады, онда 9 үй орналасқан, былтыр электр энергиясы мәселесі шешілгеннен кейін, биыл бұл жерге су да тартылды. Енді демеушінің есебінен істен шыққан су сорғысы мен қажетті жабдықтар сатып алынып, жақын арада ауыз су мәселесі шешімін табатын болады.
Аудан тұрғындарын Қоянкөз, Малайсары ауылдарында спорт кешендерінің құрылысы, мемлекеттік тұрғын үй қорынан баспана бөлу, ауыз сумен үздіксіз қамтамасыз ету, медицинада салалық мамандардың жетіспеушілігі, кәріз жүйелерін жөндеу және салу сияқты мәселелер де толғандырды.
Кездесуде жалпы саны 20-дан астам сұрақ қойылып, олардың барлығына жауапты тұлғалар тарапынан нақты түсініктемелер берілді.
Ә. Жақанбаев өз сөзінде облыс әкімінің тапсырмасына сәйкес ең алдымен халықты ауыз сумен, сапалы медициналық қызметпен, жолмен, тұрғын үймен және газбен қамтамасыз ету мәселелері шешіліп жатқанын айтты. Сонымен қатар өзге де туындаған мәселелер өңірді дамыту жоспарына сәйкес кезең-кезеңімен шешілетін болады.
Сол күні азаматтарды жеке мәселелері бойынша қабылдау өткізілді. Оның барысында тұрғындар негізінен жер және тұрғын үй мәселелерін көтерді.
Мәселен, Сарыөзек ауылының тұрғыны Рашида Дәулетова Сарыөзек ауылындағы газбен қамтылмаған үйлердің қашан газдандырылатынын сұрады. Бұл мәселеге қатысты бұрын газ желісі тартылмаған үйлерге газ құбырын жүргізу келесі жылдың І жартысында аяқталады деп жоспарланғаны айтылды.
