Қазақстанда құны $1,35 млрд болатын, аммиак пен карбамид өндіретін зауыт құрылысы басталады, – деп хабарлайды Dalanews.kz.
Премьер-министр Олжас Бектенов тиісті қаулыға қол қойды. Биылғы 4 наурызда ESTA Construction компаниясының басшылығымен кездесу барысында премьер-министр жауапты министрліктерге екі апта ішінде тыңайтқыштар шығаратын зауыт салу үшін инвестициялар туралы келісімге қол қоюға дайындауды тапсырды.
Жобаны QazaqGaz және ESTA бірлескен кәсіпорны — «Qazesta Fertilizers LTD» компаниясы базасында іске асыру жоспарланып отыр. Зауыттың орны ретінде Маңғыстау облысы таңдалды, бұл өнімдерді Каспий теңізі арқылы экспорттауға оңтайлы жағдайларды қамтамасыз етеді. Esta Construction әлемдегі ең үздік 100 құрылыс компаниясының қатарына кіреді.
Жобаның құны: $1,35 млрд. Құрылысты үш жарым жылда аяқтау жоспарланып отыр. Іске асыру кезеңінде 3 мыңға дейін адам тартылып, құрылыс аяқталғаннан кейін 400 тұрақты жұмыс орны ашылады.
Зауыттың өндірістік қуаты жылына 700 мың тоннаға дейін карбамидке және 42 мың тонна аммиакқа жетеді.
Жоба газ химиясы саласын дамытуға, сондай-ақ, импортты алмастыруға және қосылған құны жоғары өнімдерді дайындауға бағытталған.
Қазір Қазақстанда тыңайтқыштардың үш түрін өндіру жолға қойылған: аммиак селитрасы, аммофос және аммоний сульфаты. 3,2 млн тонна ғылыми қажеттілік кезінде отандық қуаттар сұраныстың жартысына жуығын ғана қамтамасыз етеді.
Карбамид өндірісін құру жөніндегі жобаны іске асыру импортқа тәуелділікті азайтуға және еліміздің азық-түлік қауіпсіздігін нығайтуға мүмкіндік береді. Сондай-ақ, ауыл шаруашылығының дамуына оң әсер етеді.
