Депутат Бақытжан Базарбек жер мәселелеріндегі сот шешімдеріне қатысты басты проблеманы атады, - деп хабарлайды Dalanews.kz Bes.media-ға сілтеп.

Республикалық жер комиссиясы Jer Amanaty төрағасының орынбасары, депутат Бақытжан Базарбек Қазақстандағы жер мәселелері бойынша сот шешімдерінің орындалмауына байланысты ҚР Бас прокуроры Берік Асыловқа сауал жолдады.

Бақытжан Базарбек соттың ғимараттарды немесе жер учаскелерін бұзу немесе қайтару туралы шешімдерінің орындалмай жатқан нақты мысалдарын келтірді.

«Әл-Фараби атындағы ҚазҰУ маңындағы заңсыз иеленген жер учаскесі сот шешімімен мемлекет меншігіне қайтарылуы керек еді, ал ол жердегі бизнес-орталық бұзылуы тиіс болатын. Алайда бұл жер әлі күнге дейін мемлекетке берілмеген, ал бизнес-орталық әлі де жойылған жоқ», – деді депутат.

Алматыдағы алма бақтарына қатысты іс бойынша да осындай жағдай орын алған.

«2021 жылдың 13 қаңтарындағы Алматы мамандандырылған экономикалық сотының шешімі және 2023 жылдың 25 желтоқсанындағы Алматы қалалық сотының жердің мақсатты тағайындауын өзгерту және сату-сатып алу келісімшартын жою туралы қаулысы орындалмаған. Сот арқылы алма бақтары заңды түрде мемлекетке қайтарылды, бірақ іс жүзінде жеке және заңды тұлғалардың қолында қалып отыр», – деді Базарбек.

Депутат Алматыда заңсыз салынған тұрғын үйлерді бұзу бойынша 86 талаптың тек 59-ы ғана қанағаттандырылғанын атап өтті. Оның айтуынша, әділет органдары мен сот орындаушылары сот шешімдерінің орындалу мерзімдерін әдейі созып, кедергілер жасайды.

Бақытжан Базарбек Шымкенттегі мысалды да келтірді. Онда 2023 жылдың 17 мамыры мен 13 шілдесіндегі Шымкент мамандандырылған экономикалық сотының шешімдері бойынша Hyundai дилерлік орталығы мен тұрғын үй құрылысы үшін жер учаскесін беру туралы қала әкімінің барлық қаулылары жойылған. Депутат бұл шешімдердің орындалуы әдейі кейінге шегерілуде деп санайды.

«Ешкім оны орындауға ниетті емес, ешкім заңсыз салынған тұрғын үй мен Hyundai орталығын бұзуға кіріспей отыр. Керісінше, шенеуніктер кулуарлық келіссөздер жүргізуде, олардың мақсаты – сот шешімдерін жұмсақ және залалсыз айналып өту», – деді депутат.

Бақытжан Базарбектің айтуынша, ел бойынша осындай 900-ге жуық жағдай бар. Ол қоғамның сот шешімдеріне деген сенімі төмендеп бара жатқанын және бұл мәселе түбегейлі өзгерістерді талап ететінін жеткізді.

Бұл мәселені шешу үшін депутат Бас прокуратураға бірнеше ұсыныспен жүгінді.

Біріншіден, сот шешімдерінің орындалуын қамтамасыз ету үшін Әділет министрлігіне ұсыныс енгізуді сұрады. Сонымен қатар, Индустрия және құрылыс министрлігіне заңсыз салынған тұрғын үйлер мен басқа да заңсыз нысандарды бұзу туралы нұсқау енгізуді талап етті.

Екіншіден, генерал Новиковтың алма бағы орналасқан жер учаскесін мемлекет меншігіне қайтаруға ерекше назар аударуды және бақ шаруашылығымен айналысатындарға бұл жерлерді мемлекетке өткеннен кейін бөлу мәселесін қарастыруды сұрады.