2026 jylǵy 1 qańtardan bastap Qazaqstanda zeınetaqy tólemderi men turǵyn úıge nemese emdelýge arnalǵan birjolǵy zeınetaqy tólemderi jeke tabys salyǵynan bosatylady, dep habarlaıdy Dalanews.kz.

Jańa Salyq kodeksine sáıkes, Biryńǵaı jınaqtaýshy zeınetaqy qorynan (BJZQ) alynatyn barlyq zeınetaqy tólemderinen endi 10 paıyzdyq jeke tabys salyǵy ustalmaıdy. Bul ózgeris tek Qazaqstannyń rezıdenti emes azamattarǵa tólenetin zeınetaqy tólemderine qoldanylmaıdy.

Buǵan deıin zeınetaqy men birjolǵy tólemder tabys retinde qarastyrylyp, odan 10 paıyz salyq ustalyp kelgen. Al birjolǵy tólemderdi paıdalanǵan kezde azamattar salyqty birden nemese keıinge qaldyrý arqyly tóleýge májbúr bolatyn.

2026 jyldan bastap bul talaptar alynyp tastalady. Sonymen qatar, buryn keıinge qaldyrylǵan jeke tabys salyǵy boıynsha mindettemeler de joıylady. Alaıda buryn búdjetke tólengen salyqtar keri qaıtarylmaıdy.

Áleýmettik osal toptarǵa jatatyn azamattar úshin erekshe tártip saqtalady. Olar birjolǵy zeınetaqy tólemderi boıynsha keńeıtilgen salyqtyq shegerim qoldana alady. Eger mundaı azamattar buryn salyq tólep qoıǵan bolsa, úsh jyl ishinde BJZQ-ǵa ótinish berip, artyq tólengen somany qaıtaryp alý múmkindigi bar.

Bul ózgerister azamattardyń zeınetaqy jınaqtaryn tıimdi paıdalanýyna jáne qarjylyq júktemeni azaıtýǵa baǵyttalǵan.