Jetisý oblysynda esirtki saittarynyń jarnamasyn graffiti arqyly taratqan turǵyn 3 jyl 6 aiǵa bas bostandyǵynan aiyryldy, dep habarlaidy dalanews.kz.
Kóksý aýdandyq soty qoǵamdyq oryndarda tyiym salynǵan internet-resýrstardy zańsyz jarnamalaǵan jergilikti turǵyn K.-ǵa qatysty úkim shyǵardy. Sot materialdaryna sáikes, ol zańsyz biznesti uiymdastyrýshylarmen aldyn ala sóz bailasyp, tyiym salynǵan aqparatty taratýǵa kelisken.
Sottalýshy Balpyq bi aýylyndaǵy qorshaýlarǵa, qaqpalarǵa jáne elektr berý jelileriniń tirekterine markermen esirtkige qatysty internet-resýrstardyń siltemeleri bar graffiti jazýlaryn salǵan. Keiin atqarǵan jumystary boiynsha koordinattary kórsetilgen fotoesepti kýratorlarǵa jiberip otyrǵan.
Sot qoǵamdyq imandylyq pen halyqtyń densaýlyǵyna qarsy jasalǵan qylmystyń aýyrlyǵyn eskere otyryp, K.-ny 3 jyl 6 aiǵa bas bostandyǵynan aiyrýǵa úkim shyǵardy. Oblystyq sottyń qylmystyq ister jónindegi apelliatsiialyq satysy úkimdi ózgerissiz qaldyrdy. Sot sheshimi zańdy kúshine endi.
Jetisý oblysynyń prokýratýrasy esirtki quraldaryn, psihotroptyq zattardy jáne olardyń analogtaryn kez kelgen nysanda, sonyń ishinde graffiti, áleýmettik jelilerdegi jazbalar men messendjerler arqyly nasihattaý nemese zańsyz jarnamalaý qylmystyq jaýapkershilikke ákeletinin eskertti.
Bul áreketter QR Qylmystyq kodeksiniń 299-1-baby boiynsha saralanady.
