IýNISEF «Qazaqstan balalary» ulttyq baǵdarlamasynyń (2026–2030) qabyldanýyn quptaıdy
Astana, 2026 jylǵy 27 qańtar — IýNISEF «Qazaqstan balalary» (2026–2030) ulttyq baǵdarlamasynyń qabyldanýyn quptaıdy. Bul — el halqynyń shamamen 34 paıyzyn quraıtyn 6,9 mıllıon balanyń ál-aýqatyn jaqsartýǵa baǵyttalǵan keshendi ulttyq strategıa.
Qazaqstan Respýblıkasynyń Prezıdenti Qasym-Jomart Toqaevtyń bastamasymen ázirlengen baǵdarlama balalar múddesindegi memlekettik saıasattyń biryńǵaı strategıalyq kózqarasyn qalyptastyrady jáne 2026–2030 jyldar aralyǵynda balalardy áleýmettik qorǵaý, densaýlyq saqtaý, bilim berý jáne qaýipsizdik salalaryn nyǵaıtýǵa baǵyttalǵan 158 naqty is-sharany qamtıdy. Baǵdarlamanyń jalpy búdjeti 2,6 mlrd AQSH dollaryn quraıdy.
Baǵdarlama otbasylardy qoldaýǵa jáne pozıtıvti ata-ana tárbıesin damytýǵa, balalardyń sıfrlyq qaýipsizdigin qamtamasyz etýge, sondaı-aq balaǵa baǵdarlanǵan ınfraqurylymdy damytýǵa, onyń ishinde jańa medısınalyq jáne ońaltý mekemelerin salýǵa, ınklúzıvti jáne balaǵa qolaıly qyzmetterdi keńeıtýge erekshe nazar aýdarady. Sonymen qatar, óńirlik deńgeıde balalardy qorǵaý júıesin kúsheıtý, mamandardyń kásibı standarttaryn arttyrý jáne mektepterde psıhologıalyq qoldaýdy damytý mańyzdy basymdyqtardyń biri bolyp tabylady.
IýNISEF Qazaqstan Úkimetimen birlese otyryp baǵdarlamany ázirleý barysynda negizgi strategıalyq áriptes retinde áreket etti jáne Balalar quqyqtary týraly konvensıanyń halyqaralyq normalary men standarttarynyń, BUU-nyń jahandyq strategıalarynyń jáne ozyq halyqaralyq tájirıbelerdiń ulttyq saıasatqa engizilýin qamtamasyz etti. IýNISEF sarapshylary baǵdarlamanyń arhıtektýrasyn qalyptastyrýǵa, onyń ishinde tujyrymdamalyq negizderdi, nátıjelik kórsetkishterdi, salaaralyq úılestirý tetikterin, sondaı-aq iske asyrýdy monıtorıńteý jáne baǵalaý tásilderin ázirleýge júıeli qoldaý kórsetti.
IýNISEF sondaı-aq baǵdarlamanyń negizgi komponentterin ázirleýge qoldaý kórsetti, onyń ishinde balalar men otbasylardy erte anyqtaý jáne súıemeldeý júıelerin damytý, balalardy qorǵaýǵa arnalǵan sıfrlyq sheshimder, áleýmettik jáne psıhologıalyq qoldaý qyzmetterin keńeıtý, sondaı-aq balalar quqyqtaryn qorǵaý salasyndaǵy mamandardyń kadrlyq áleýetin nyǵaıtý bar. Baǵdarlama balalardyń naqty qajettilikterine baǵdarlanýyn qamtamasyz etý úshin IýNISEF jahandyq dáleldi tájirıbelerge, MICS1 derekterine jáne analıtıkalyq zertteýlerge súıendi.
Baǵdarlama Qazaqstan Respýblıkasynyń Memlekettik keńesshisiniń, Bala quqyqtary jónindegi ýákildiń, Oqý-aǵartý mınıstrliginiń, Balalardyń quqyqtaryn qorǵaý komıtetiniń, sondaı-aq azamattyq sektor men ulttyq konsýltasıalar barysynda pikirleri eskerilgen balalardyń qatysýymen júzege asqan tyǵyz vedomstvoaralyq yntymaqtastyqtyń nátıjesi bolyp tabylady.
«Qazaqstan balalary» baǵdarlamasynyń qabyldanýy Turaqty damý maqsattaryna, onyń ishinde TDM 3 «Densaýlyq pen ál-aýqat», TDM 4 «Sapaly bilim» jáne TDM 10 «Teńsizdikti qysqartý» maqsattaryna qol jetkizýge mańyzdy úles qosyp, balalardyń quqyqtaryn qorǵaýdyń ulttyq júıesin nyǵaıtady.
IýNISEF baǵdarlamany iske asyrý barysynda Qazaqstan Úkimetimen strategıalyq áriptes retinde yntymaqtastyqty jalǵastyra otyryp, halyqaralyq saraptamany jumyldyrýdy, ulttyq jáne óńirlik deńgeılerde reformalardy engizýge qoldaý kórsetýdi, turaqty qarjylandyrý jáne eseptilik júıelerin damytýdy, sondaı-aq balalar men jastardyń saıasatty qalyptastyrýǵa qatysýyn kúsheıtýdi qamtamasyz etedi.
