Qazaqstan men Iran Respýblikasy arasyndaǵy qarym-qatynastardy odan ári nyǵaitý, onyń ishinde birlesken týrizmdi damytý maqsatynda is-sharaǵa Aqtaý qalasyndaǵy Iran Islam Respýblikasynyń Bas konsýly Habibolla Malakýti Far jáne Iran Islam Respýblikasynyń bir top týroperatorlary qatysty.
Jiynda sóz alǵan aimaq basshysy Mańǵystaý oblysy shetelden kelgen týristerdi qarsy alýǵa árdaiym daiyn ekenin jetkizdi.
– Mańǵystaý oblysynyń bai mádeni-tarihi murasy bar. Munda ornalasqan tabiǵi, mádeni jáne tarihi eskertkishter Mańǵystaý túbegine biregeilik berip, jergilikti turǵyndar men týristerdiń mádeni qundylyqtaryn qalyptastyrýda erekshe áser beredi.
Qazaqstan Respýblikasynyń Prezidenti Qasym-Jomart Toqaev "Jańa Qazaqstan-jańǵyrý jáne Jańarý joly" aiasynda elimizde bolyp jatqan jańa ózgerister taiaý jyldary Qazaqstandaǵy ekonomikalyq ósýdiń jańa qozǵaltqyshyna ainalatynyn jáne búgingi kezdesý eki el arasyndaǵy týrizm salasyn odan ári damytýǵa oń yqpal etetinin atap ótti. Búgingi kezdesýdiń barlyq qatysýshylaryna, uiymdastyrýshylary men qonaqtaryna tabysty jumys, tiimdi ózara yntymaqtastyq, berik seriktestik bailanystar, amandyq jáne belgilengen josparlardyń tabysty júzege asýyn tileimin, – dedi Nurlan Noǵaev.
Sońǵy 3 aida óńirge 55 myńnan astam týrist kelgen. Mańǵystaý tabiǵaty tarihi oryndarmen, taýly aimaqtarmen, teńiz jaǵalaýymen erekshelenedi.
Iran azamattary úshin vizasyz rejim engizý – Qazaqstan men Iran Respýblikasy arasyndaǵy týrizmdi damytýdyń mańyzdy faktory bolyp sanalady.
Iran týroperatorlarynyń aitýynsha, Mańǵystaý jerine bastapqyda 10 myńnan astam týrist kelýge múmkindik bar.
– Biz aviareisterdi aptasyna eki ret, odan keiin kúnine bir reiske deiin ulǵaitýdy josparlap otyrmyz. Biz yntymaqtastyqqa árdaiym ashyqpyz jáne onyń jemisti bolatynyna senimdimiz. Ázirge bizdiń elimizden Qazaqstanǵa keletin týristerdiń naqty sanyn anyqtaý múmkin emes. Biraq bul kórsetkish bastapqyda jylyna 10 000 týristke deiin jetedi dep oilaimyz.
Biz qazaq halqynyń qonaqjailylyǵyna óte rizamyz. Mańǵystaý jeriniń tabiǵaty erekshe. Iran týristeri tarihi jerlerde, teńiz jaǵalaýlarynda demalǵandy jaqsy kóredi, – dedi Irannan kelgen týristik agenttiktiń direktory Vahid Heidari.
