Tarihi eskertkishti jaryqtandyrý úshin 1200 metr elektr sym qoldanylyp, 229 túrli-tústi sham búgin saltanatty túrde jaǵyldy. Biregei jobany júzege asyrý kezinde tarihi eskertkishtiń árbir bólshegin saqtaý talap etildi. Shamdy jaǵýǵa arnalǵan saltanatty is-sharaǵa Túrkistan oblysynyń ákimi Ómirzaq Shókeev qatysty. Áigili ziiarat etý oryndaryndaǵy jaryqtandyrý tájiribesi týraly aitqan ákim jurtshylyqty quttyqtady.
Kesene mańyn jaryqtandyrý jobasy QR Mádeniet jáne sport ministrliginiń qoldaýymen, «Qazqaitajańartý» RMK saraptamalyq qorytyndysymen, arheologtarynyń usynystary eskerile otyryp júzege asyrylǵan. Jobanyń tehnikalyq direktory Baǵila Isakovanyń aitýynsha, mamandar jobaǵa kirispes buryn Iassaýi kesenesine uqsas álemdegi áigili tarihi murajailarda zertteý jáne taldaý jumystaryn júrgizgen.
– Biz quzyrly mekemelerdiń baqylaýymen, arnaiy saraptama qorytyndysymen jumys júrgizdik. Shamdar keseneniń ainalasyna, shatyryna sapaly qondyrǵylardyń kómegimen ornatyldy. Jumys barysynda birde-bir kirpishke zaqym kelgen joq. Óitkeni jaryq qosymsha ornatylǵan qondyrǵynyń kómegimen jalǵandy, – deidi joba jetekshisi.
Mamandardyń aitýynsha, optika men jaryq sipattamalarynyń ózgerýi kezinde epigrafikanyń ártúrli elementteri, iaǵni kesene qabyrǵalaryndaǵy kalligrafiialyq jazýlar kórinedi. Keseneniń dál osy tańǵajaiyp kórinisi jaryqtandyrýdyń eń negizgi ereksheligine ainalmaq.
Kesene mańyndaǵy botanikalyq baqta ótken rýhani keshte Sh.Qaldaiaqov atyndaǵy oblystyq filormoniiasynyń «Súgir» atyndaǵy qazaq ult aspaptar orkestri, «Astana Balet» teatrynyń ónerpazdary men tanymal ánshiler óner kórsetti.
