Is-shara aiasynda L.Gýmilev atyndaǵy Eýraziia ulttyq ýniversitetiniń Zamanaýi zertteýler institýtynyń direktory Muhit-Ardager Qarjaýbaiulynyń «Qazaqstannyń úzilissiz memlekettiligi tarih tolqynynda. XVI-XIX ǵasyrlardaǵy eýropalyq jáne amerikalyq kartalardaǵy Qazaq Memleketi. Atlas» kitabynyń zertteý nátijesinde jinaǵan qazaq kartalarynyń kórmesi qoiyldy.
Jiynda ýniversitet rektory Janar Temirbekova Túrkistan jurtshylyǵyn aitýly mereitoiymen quttyqtap, atalǵan galereianyń ýniversitette uiymdastyrylýynyń maqsaty men mańyzyn atap ótti.
Kitap avtory qazaq halqynyń kartalaryn izdeý barysyndaǵy qiyndyqtary, eńbek jolyn, zertteý tásilderi men tarihyn keńinen baiandady.
– Kitapta jinalǵan 2000 kartanyń 130-y ǵana engen. Qazaq kartasyn jinaýǵa 17 jyl ýaqyt ketti. Barlyq kartany bir kitapqa syidyrý múmkin bolmady. Aldaǵy ýaqytta kitaptyń 7 tomyn jaryqqa shyǵarý josparda bar, – dedi ǵalym.
Zertteý barysynda Italiia, Ispaniia, Shvetsiia, Frantsiia syndy basqa da iri memleketterdiń muraǵattarynan qundy qujat bolyp sanalatyn kartalary tabylǵan.
Túrkistan oblysynyń mereili merekesine syi bolǵan bul galereianyń mańyzy zor. Sebebi, galereia – Túrki jurtynyń ortaq rýhani astanasy atanǵan Túrkistannyń karta betterinde, ózge elderdiń tarihi muraǵatynda syzbalarmen saqtalǵanyn aiqyn kórinisi. Kópshilik Qazaq jerinen bólek, Túrkistannyń geografiialyq aimaǵy men Iassy, Haziret Sultan syndy ataýlarmen álem tarihynda qalǵan iri óńir ekenine taǵy da kóz jetkizdi.
Ǵalym Túrkistannyń tórinde túrki jastarynyń basyn qosqan bilim ordasyna qazaq kartalaryn syiǵa tartty. Kezdesý sońynda zertteýshi Muhit-Ardager Qarjaýbaiuly ýniversitet basshylary jáne Túrkistannyń ziialy qaýym ókilderimen birge galereianyń lentasyn qidy.
