Talǵarda atyshýly «Hýtor» qylmystyq tobynyń basshysy dep tanylǵan Hasan Qasymbaevtyń isi boıynsha sot prosesi aıaqtalýǵa jaqyn. Sottalýshy sońǵy sózin aıtyp, ózine taǵylǵan barlyq aıyptaýlardy joqqa shyǵardy, dep habarlaıdy Dalanews.kz

«Tergeý barysynda Qylmystyq is júrgizý kodeksiniń normalary óreskel buzyldy. Maǵan qarsy birde-bir naqty dálel usynylǵan joq. İste tek jalǵan jábirlenýshilerdiń sózderi ǵana bar», – dedi Qasymbaev.

Onyń aıtýynsha, qoǵamdaǵy rezonansty basý maqsatynda ózin aıypty etip kórsetken.

«Bul – ádildikke de, zańǵa da, adamgershilikke de qaıshy. Eger mundaı jaǵdaı jalǵasa berse, bılik júıesine ózgeris qajet», – dedi aıyptalýshy.

Aikyn.kz málimetinshe Qasymbaev bir jyldan astam ýaqyttan beri tergeý ızolátorynda qamaýda otyrǵanyn jáne bul sheshimdi zańsyz dep sanaıtynyn aıtty. Onyń sózinshe, osy kezeńde otbasy men kámeletke tolmaǵan balalary qatty zardap shekken.

Sottalýshy ózine aqtaý úkimin shyǵarýdy surap, ádil sheshimge senim bildirdi.

«Maǵan aıyptaý úkimin shyǵaryp, taǵdyrymdy talqandamańyzdarshy. Men Qudaı men zań aldynda tazamyn. Biz bárimiz bul ómirde ýaqytsha qonaqpyz. Eń bastysy – ádildik pen shyndyq», – dep sózin qorytyndylady ol.

Aıta keteıik, memlekettik aıyptaýshy Qasymbaevty 15 jylǵa bas bostandyǵynan aıyrýdy suraǵan bolatyn.