2025 jylǵy 12 mamyrda Astana qalasynda Halyqaralyq volonterler jylyna daıyndyq jáne ótkizý boıynsha Ulttyq uıymdastyrý komıtetiniń alǵashqy otyrysy ótedi, dep habarlaıdy Dalanews.kz.
Esterińizge sala keteıik, Qazaqstan Respýblıkasy Prezıdenti Qasym-Jomart Toqaevtyń bastamasymen BUU Bas Assambleıasy 2026 jyldy Turaqty damý maqsattaryndaǵy Halyqaralyq volonterler jyly dep jarıalaǵan bolatyn.
Atalǵan is-shara barysynda volonterlik qozǵalysty damytý men azamattyq belsendilikti arttyrýǵa baǵyttalǵan negizgi baǵyttar, bastamalar men josparlanǵan is-sharalar talqylanatyn bolady.
Otyrysqa BUU Eriktiler baǵdarlamasynyń atqarýshy úılestirýshisi Toıly Qurbanov, sondaı-aq memlekettik organdardyń, qoǵamdyq uıymdardyń jáne volonterlik birlestikterdiń ókilderi qatysady.
Búginde Qazaqstanda volonterlik qyzmet qarqyndy damyp, túrli salalardy qamtyp otyr. Qazirgi tańda elimizde 755 volonterlik uıym tirkelgen, al eriktilikpen aınalysatyn azamattardyń jalpy sany 275 myńnan asady. Volonterlik qyzmettiń basty baǵyttaryna qarttar men jalǵyzbasty jandarǵa kómek kórsetý, ómirlik qıyn jaǵdaıdaǵy azamattardy qoldaý, ekologıalyq volonterlik pen tótenshe jaǵdaılardyń zardaptaryn joıýǵa qatysý jatady.
Qazaqstan memleket pen volonterlik qaýymdastyq arasyndaǵy tabysty ınstıtýsıonaldyq áriptestiktiń úlgisin kórsetip keledi. Elimizde volonterlik qyzmettiń quqyqtyq negizderi qalyptasqan. «Volonterlik qyzmet týraly» zań qoldanysta, sondaı-aq volonterlikti 2026 jylǵa deıin damytýdyń jol kartasy júzege asyrylýda.
Volonterlik qyzmetti úılestirý maqsatynda «Qazvolunteer.kz» onlaın platformasy jumys isteıdi. Platforma volonterler men uıymdardy biriktirip, júzege asyrylyp jatqan jobalar men qatysý múmkindikteri jóninde aqparat usynady. Budan bólek, elimiz boıynsha volonterlik bastamalardy qoldaý men monıtorıń júrgizýdi qamtamasyz etetin Ulttyq front-ofıs qyzmet atqarady.
