Shymkentte WhatsApp arqyly terroristik uiymdy nasihattaǵan turǵyn sottaldy, – dep habarlaidy Dalanews.kz.
Mán-jai
Prokýratýra málimetinshe, 2024 jylǵy qyrkúiekte Shymkent qalasynda S. esimdi azamat WhatsApp messendjeri arqyly tanysy T. esimdi azamatshaǵa halyqaralyq terroristik uiym "Musylman baýyrlar" ideologiiasyn jáne "qarýly jihad" ideiasyn nasihattaityn, sondai-aq, zorlyq-zombylyqqa shaqyratyn materialdardy joldap, terroristik toptarǵa qosylýǵa úgit–nasihat jasaǵan.
Sot úkimi
Sot úkimimen S. QR QK 256-babynyń 2-bóligi (terrorizmdi nasihattaý, sondai-aq osyndai mazmundaǵy materialdardy internet-resýrstar arqyly taratý) jáne 296-babynyń 1-bóligi (terroristik ne ekstremistik áreketterdi uiymdastyrý maqsatynda adamdarǵa úgit - nasihat jasaý, daiarlaý nemese qarýlandyrý) boiynsha kináli dep tanyldy.
"Oǵan 8 jylǵa bas bostandyǵynan aiyrý jazasy taǵaiyndaldy", - dep jazylǵan habarlamada.
Aita keteiik, byltyr osyndai qylmys jasaǵany úshin 10 adam sottalǵan.
Prokýratýra bul áreketter úshin 5 jyldan 12 jylǵa deiin bas bostandyǵynan aiyrý jáne múlkin tárkileý jazasy qarastyrylǵanyn eskertedi.
