Saltanat Núkenova qaza tapqan túni meiramhanada jóndeý jumystaryn júrgizgen qyzmetker sotta kýáger bol. Sot otyrysynda jóndeý jumystaryn júrgizgen qyzmetker men meiramhana ákimshisiniń dialogy jariialandy, - dep habarlaidy Dalanews.kz.
Sotta prokýrorlar kýágerdiń uialy telefonynda tergeýge qatysy bar hattardy oqyǵan. Dialog meiramhana ákimshisi Qarlyǵash pen jóndeý jumystaryn júrgizgen qyzmetker Meiirbekov arasynda bolǵan. Dialog 9 qarashada 02.27-de bastalǵan:
Meiirbekov: Direktor qaityp keldi, vipkada otyr
Qarlyǵash bul habarlamaǵa jaýap bermegen.
Saǵat 06.35-te Meiirbekov jóndeý boiynsha júrgizilgen sýretterdi jiberip "Sýret ilinip turǵan jerdi jóndei almadyq. Qýandyq shý shyǵaryp jatyr" dep jazǵan.
Meiirbekov (06.56): Kolonnany terezege deiin boiadyq
Meiirbekov (saǵat 06.57): Vipkanyń astań-kesteńin shyǵarǵan siiaqty. Áieli tiri shyǵar dep úmittenemin
Qarlyǵash (saǵat 07.50): Nege olai dediń?
Meiirbekov (saǵat 07.50): Jalańash, pidjakpen júr
Qarlyǵash: Olar áli sonda ma?
Meiirbekov: biz ketip bara jatqan kezde ol áielin ne uryp jatty, ne zattardy qiratyp jatty, ketip qaldyq
Qarlyǵash: Durys istepsińder, ol iship alǵan ba?
Meiirbekov: Áielimen sylqiia iship alǵan
Qarlyǵash: Sharshatty ǵoi ábden
Meiirbekov: Áinek terezeni syndyra jazdady
Qarlyǵash: Kúzet bolmady ma?
Meiirbekov: Joq, asúidi qiratty
Aita keteiik, 27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Sot otyrystarynda oqiǵa bolǵan kezdiń, dálirek, Bishimbaev Saltanatty shashynan súirep, tepkilegen sumdyq kadrlar kórsetildi.
Al búgin Qýandyq Bishimbaev Saltanat Núkenova qaitys bolǵan túni ne úshin kóripkelge habarlasqanyn túsindirdi. Onyń sózinshe, qaiǵyly oqiǵa bolǵan túni jedel járdem shaqyrýdyń ornyna habarlasqan kóripkel Shymkentte turady.
"Bizneske qatysty suraqtarǵa bailanysty habarlasyp turatynmyn. Onyń meditsinalyq bilimi bar-joǵyn bilmeimin. Oǵan senetinmin", - deidi Bishimbaev.
Sonymen qatar, eks-ministr qaiǵyly oqiǵa bolǵan túni nelikten basqa qalada júrgen kóripkelge habarlasqanyn aitty.
"Siz (advokat - esk.) Saltanat meditsinalyq kómekke zárý bolyp jatqanda deisiz. Meniń túsinigimde ol (Saltanat - esk.) uiyqtap jatqan bolatyn. Men oǵan (kóripkelge - esk.) sengenmin dep aittym. Betinde sol jaǵynda kógerip turǵan jer úlkeie bastady. Ol qaidan shyqqanyn suraiyn dedim. Kóripkel "bári durys, keshke deiin uiyqtasyn, sharshaǵan ǵoi" dedi", - deidi Bishimbaev.
