Kezinde norvegtiń áigili zertteýshisi hám saiahatshysy Týr Heierdal óziniń arǵy atalary vikingter Qazaqstan men Reseidiń ońtústik bóliginen shyqqan dep joramal jasaǵan edi. Taiaýda Heierdaldyń qyzy Bettina áke amanatyn arqalap Qazaqstanǵa keldi. Ol ákesiniń jasaǵan joramalyn ǵylymi turǵydan anyqtaýǵa bekinip otyr.
Búginde Bettina Heierdal bastaǵan ekspeditsiia Qaraǵandy murajailaryndaǵy adam qaldyqtaryn zertteýge kirisip ketken. Olardyń maqsaty – babalarynyń otany men júrip ótken jerlerin anyqtaý. «Kon-Tiki» murajaiynynyń ókili Bettina Heierdal:
– Ákem Qazaqstanda bolǵan emes. Mynadai kóne jádigerlerdi kórip, tań qalar edi. Qazaqstanda tarihi qundy muralar jaqsy saqtalǵan, – dedi. Jalpy adam qaldyqtarynyń DNK-syn zertteý ońai emes. Ol úshin ǵalymdar bas súiektiń usaq talshyqtary men tisterdiń úgindisine deiin úńilýleri kerek. Al jinalǵan materialdardyń barlyǵyn óńdep shyǵýǵa birneshe jyl ýaqyt ketedi. Sondyqtan zertteý jumystaryna qajetti súiek qaldyqtary men tister Kopengagendegi zerthanaǵa jóneltiledi. Zertteý jumystary aiaqtalǵan soń, Qaraǵandyǵa qaitarylmaq. Onyń qorytyndysy boiynsha keń taralǵan úndi-eýropalyq taipalardyń qai jerden shyqqany anyqtalady.
